Reddi

dansk-svensk musikkgruppe

Reddi, stilisert REDDI, er eit dansk-svensk punkrockband som består av trommeslagaren Ihan Haydar, vokalisten og gitaristen Mathilde «Siggy» Savery og Ida Bergkvist på bass. Bandet vann Dansk Melodi Grand Prix 2022 med låten «The Show» og representerte Danmark i Eurovision Song Contest 2022 i Torino.

Reddi

Aktiv2022–
Sjangerpønkrock, rock, poprock

Bakgrunn endre

Bandet vart sett saman for deltakinga i Dansk Melodi Grand Prix 2022.[1] Bandet spelar musikk inspirert av 1970-talspunk og 1980-talsrock. Det hentar også inspirasjon frå nyare sjangrar og artistar som P!nk, Katy Perry og Green Day.[2][1]

Bandet vart sett saman av trommisen Ihan Haydar saman med den danske musikkprodusenten Lars Pedersen, kjend som Chief1.[1] Haydar spelte tidlegare i det danske bandet L.I.G.A. og spelte trommar då Soluna Samay representerte Danmark med «Should’ve Known Better» i Eurovision Song Contest 2012. I tillegg til Haydar består bandet av danske Mathilde «Siggy» Savery og svenske Ida Bergkvist.[3] Gitaristen Agnes Roslund var også medlem av bandet, men forlet det hausen 2022. Årsaka var at ho flytta heim til Sverige for å studere ved ein musikkskule.[4]

Reddi hadde si fyrste store offentlige framsyning 5. mars 2022, då det deltok i Dansk Melodi Grand Prix 2022 på DR1. Gruppa fekk flest poeng i avrøystinga og vann tevlinga med songen «The Show». Bandet fekk dimed representere Danmark i Eurovision Song Contest i mai 2022. Bandet deltok i den fyrste semifinalen tysdag 10. mai, men kvalifiserte seg ikkje til finalen etter å ha vorte nummer 13 av 17 i semifinalen.[5][6] Dette var andre år på rad at Danmark vart slege ut av semifinalen.

Songen «The Show» er skriven av Ihan Haydar og vokalisten Savery, saman med Julia Fabrin, som var ein av skribentane bak 2013-vinnaren «Only Teardrops». Chief1 og låtskrivaren Remee har også vore med på å skrive vinnarbidraget.[1]

Diskografi endre

Singlar endre

  • 2022 – «The Show»
  • 2022 – «Bad Pop Song»

Kjelder endre

  1. 1,0 1,1 1,2 1,3 «Denmark: The girl-punk-rock-band Reddi wins Melodi Grand Prix 2022». Eurovisionworld (på engelsk). 5. mars 2022. Henta 5. mars 2022. 
  2. «Denmark brings 'The Show' to Turin: REDDI win 'Melodi Grand Prix' 🇩🇰». Eurovision.tv (på engelsk). 5. mars 2022. Henta 5. mars 2022. 
  3. «Girl power! Rockgruppe vinder Dansk Melodi Grand Prix». DR (på dansk). 5. mars 2022. Henta 5. mars 2022. 
  4. «Nu er de kun tre: Guitaristen er smuttet». Ekstrabladet (på dansk). 5. mars 2022. Henta 4. desember 2022. 
  5. «REDDI win Dansk Melodi Grand Prix 2022 and will represent Denmark at Eurovision with “The Show”». wiwibloggs (på engelsk). 5. mars 2022. Henta 5. mars 2022. 
  6. «REDDI - Denmark - Turin 2022». Eurovision.tv (på engelsk). Henta 19. juni 2022.