Richard Furuholmen
Richard Christensen Furuholmen (15. januar 1840–8. juli 1899) var ein norsk fløytingsinspektør og gardbrukar frå Varteig i Østfold, og stortingsmann for Høgre. Han var far til Gunerius Furuholmen og farfar til Richard Gustav Furuholmen.
| Richard Furuholmen | |||
| Fødd | 15. januar 1840 | ||
|---|---|---|---|
| Død | 8. juli 1899 (59 år) | ||
| Statsborgar av | Noreg | ||
| Yrke | politikar | ||
| Alle verv |
| ||
Furuholmen var son til ein lensmann, gardbrukar og lensestyrar. Sjølv var han eit år elev ved realskulen i Sarpsborg. Frå 1860 var han assistent hos faren og såg til tømmerlensene forbi familieeigedomen. Han tok over som lensestyrar i 1874 og farsgarden Furuholmen i 1881. Fire år seinare flytta han til Tune. Der arbeidde han som fløytingsinspektør ved Hvitsten lense, og hadde i tillegg eit gardsbruk.
Furuholmen utvikla dei fyrste maskinar i tømmerfløytinga og bygde 1885-95 fløytingsanlegg i Glomma basert på nye metodar. År 1887 stod han for bygginga av fløytingsrenna forbi Sarpsborg. Han var elles konsulent for fløytingsvesenet i fleire elvar i Nord-Sverige. Ved ei utstilling i Stockholm vart han premiert med sølvmedalje for fløytingsverk.
Furuholmen var ordførar i Varteig 1880-84 og i Tune 1888-95. Han var direktør i Tune Sparebank frå 1886. Perioden 1889-91 var han 3. representant frå Smaalenenes amt på Stortinget. Han var då medlem av tollkomiteen.
Han døydde på garden sin, Hanestad, i Tune i 1899.
Kjelder
endre- Lindstøl, Tallak: Stortinget og Statsraadet 1814-1914. Kristiania, 1914