Vadsø kyrkje

Vadsø kyrkje er ei langkyrkje frå 1958 som står på ei høgd i Vadsø by i Vadsø kommune i Finnmark. Kyrkja var bygd i betong i åra 1954-1958 og artikekten for bygget var Magnus Poulsson, som òg var ein av hovudarkitektane for Oslo rådhus.

Vadsø kyrkje
kyrkje
Land	Noreg
Fylke	Finnmark
Kommune	Vadsø
Kyrkjesamfunn	Den norske kyrkja
Bispedøme	Nord-Hålogaland
Prosti	Varanger
Sokn	Vadsø
Fellesråd	Vadsø
Type	Langkyrkje
Arkitekt	Magnus Poulsson
Material	Betong
Innvigd	30. mars 1958
•  Endringar	Restaurert utvendig sommaren 2005
Sitjeplassar	480
Vadsø kyrkje 70.07586°N 29.75017°E / 70.07586; 29.75017
Wikimedia Commons: Vadsø kirke

Plasseringa til Vadsø kyrkje

Kyrkja er soknekyrkje i Vadsø kyrkjesokn i Varanger prosti.

Kyrkja står i same området som den førre Vadsø-kyrkja, men er orientert nord-sør. Vend mot byen har kyrkja har ein høg og mektig front med to tårn med ein gavl over. Under gavlen er eit høgt gyldt spir. Spiret står over hovudinngangen til kyrkja, og mellom døra og spiret står ein skulptur av apostelen Peter. Skulpturen er laga av Tone Thiis Schjetne. Utvendig er kyrkja elles dekorert med relieff i fasadebetongen. På sidene av tårna er det store ur.

Interiør

Innvendig vert merksemda drege mot alterveggen som er dekorert med måleri laga av Gretha Thiis. Midtpunktet i måleriet er ein tronande Kristus i ei mandelforma ramme. Kristus-framstillinga kan minne om den ein kjenner frå bysantiske mosaikkar. Kring korbogen som omkransar Kristus-biletet strålar ein nordljosboge i modernistisk formspråk. Måleriet fortset i glimt frå korbogen utover den boga takhimlinga som er bygd i tre. Ned frå taket over midtgangen heng ein modell av ein nordlandsbåt. I koret er det glasmåleri laga av Ragna Thiis Helland.

Inventar

Døypefonten er i kleberstein. Dåpsmugga er ein av dei få tinga som vart berga ut or gamlekyrkja då ho brann ned i 1944. Ho er i sylv og frå 1929. Preikestolen er sekskanta. Midfeltet er dekorert med ei ørn. Over preikestolen er det ein baldakin der det står «Soli Deo gloria» og to utskorne englar som held eit Haakon VII-monogram.

• 
  Korpartiet
• 
  Glasmåleri i koret
• 
  Glasmåleri i koret
• 
  Preikestol
• 
  Døypefont

Eldre kyrkjer i Vadsø

Gamlekyrkja som vart øydelagd hausten 1944. Ho var bygd i 1861 og teikna av Chr. H. Grosch.

Foto: Anders Beer Wilse

Fyrste kyrkja i Vadsø vart reist i 1575. Ho stod på Vadsøya der busetjinga då låg. Då den neste kyrkja skulle byggjast i 1710 vart det på fastlandet. Den tredje kyrkja vart reist i 1861. Dette var ei krosskyrkje bygd i tre med stutte sidearmar. Ho var teikna av Christian Heinrich Grosch, og stod til natta mellom 28. og 29. oktober 1944 då ho vart lagd i grus som fylgje av krigshandlingane.

Kjelder

• Arkitekturguide for Nord-Norge og Svalbard: «Vadsø kirke»
• «Vadsø kirke» på nettstaden til NRK

Bakgrunnsstoff

• Kyrkjesøk
• Vadsø kyrkje i kulturminnesok.no, nettstaden til Riksantikvaren
• Om Vadsø kyrkje på nettstaden til Den norske kyrkja
• Alf Henry Rasmussen (1993). «Vadsø kirke, Vadsø». Våre kirker. Norsk kirkeleksikon. Kirkenær: Vanebo forlag. s. 85. ISBN 82-75-27022-7.