Whanganui Journey

Whanganui Journey er ein tur med kano eller kajakk på elva Whanganui River på Nordøya på New Zealand. Turen, som startar ved Taumarunui og endar ved Pipiriki, er 145 km lang, og mykje av turen går gjennom delar av Whanganui National Park. Han varer vanlegvis i fem dagar.

Kanoar på Whanganui-elva.

Turen er administrert av Department of Conservation (DOC) under programmet New Zealand Great Walks. Sjølv om Great Walk-turen endar ved Pipiriki, er elva farbar enno 89 km nedetter. Eit mindre tal reisande med kano tek seg vidare fram til hovudbrua i Wanganui, dette tek to dagar i tillegg.

Om ruta

Flyfoto over Whanganui River om lag midtvegs mellom Pipiriki og Wanganui.

Ruta er delt opp i seksjonar som er elvestrekningar mellom leirstadar og hytter som følgjer:

• Taumarunui til Ohinepane : 21,5 km
• Ohinepane til Poukaria : 14 km
• Poukaria til Maharanui : 17,5 km
• Maharanui til Whakahoro : 5 km
• Whakahoro til Mangapapa : 10 km
• Mangapapa til Ohauora : 15 km
• Ohauora til John Coull Hut : 12,5 km
• John Coull Hut til Mangawaiiti : 9,5 km
• Mangawaiiti til Mangapurua : 9 km
• Mangapurua til Tieke Kāinga : 10,5 km
• Tieke til Ngaporo : 12 km
• Ngaporo til Pipiriki : 9,5 km

Kajakk ved Mangawaiiti leirstad.

Under vanlege vêrtilhøve vil elvestryka ikkje gå over grad II på den internasjonale skalaen for gradering av farbare elver. Der er fleire turoperatørar som dekkjer heile, eller delar av turen.

Overnattingar

Overnattingane langs ruta er ein kombinasjon av hytter og leirstadar, og kan ikkje bestillast på førehand. Alle som brukar elva må kjøpa eit turpass (Facilities User Pass (FUP)) om dei reiser mellom 1. oktober og 30. april, og dette er tilgjengeleg frå ulike distributørar, frå DOC i Wanganui, og frå lokale turistinformasjonar (VINs). Det er ulike prisar for ulike aldersgrupper, og for jetbåtar. Full informasjon om dette er å finna på vevsida til DOC som er ført opp under bakgrunnsstoff.

Kjelder

• Denne artikkelen bygger på «Whanganui Journey» frå Wikipedia på engelsk, den 16. januar 2015.

Bakgrunnsstoff

• Informasjon om Whanganui Journey ved Department of Conservation på New Zealand.
• Whanganui National Park, Department of Conservation|. Informasjon om Whanganui National Park.
• New Zealand Recreational Canoeing Association Guide to the Whanganui River (16th Edition - November 2005)