Aleksandr Averbukh

Aleksandr Averbukh (fødd 1. oktober 1974) er ein russisk-israelsk tidlegare stavhoppar, fødd i Irkutsk i dåverande Sovjetunionen. Han vann gullmedaljen både under EM 2002 i München og EM 2006 i Göteborg. I tillegg har han vunne sølvmedalje under VM 2001 i Edmonton, samt ein bronsemedalje under VM 1999 i Sevilla. Averbukhs personlege rekord på 5,93 m vart sett i 2003. Han konkurrerte for Israel frå 1999, tidlegare for Russland.

Aleksandr Averbukh
Statsborgarskap	Israel
Fødd	1. oktober 1974 (50 år) Irkutsk
Idrett	friidrett
Tok del i	Sommar-OL 2008, Sommar-OL 2004, Sommar-OL 2000

Aktiv

Til liks med faren var Averbukh tikjempar, han presterte 8084 poeng i 1997. Under europameisterskapen innandørs i 1998 deltok han for Russland i mangekampen og vart nummer seks.

Han utvandra så til Israel og vart israelsk statsborgar 3. august 1999. Straks etter deltok han for landet i VM i friidrett 1999 i Sevilla, der han vann bronsemedaljen med 5,80 m. I 2000-sesongen vart han europameister i stavhopp innandørs, og nummer ti i same øvinga under sommarleikane i Sydney. Året etter vann han stavhopptevlinga i universiaden. Same sesongen tok han sølvmedaljen under friidretts-VM i Edmonton, bakom Dmitri Markov som representerte Australia. Både Markov og Averbukh var ferske utvandrarar frå Russland.

Averbukh nådde toppen då han vann gullmedaljen i stavhopp i EM 2002 i München. Han var då åleine om å ta seg over 5,85 m. I 2003 sette han med 5,93 meter personleg bestenotering, i 2014 framleis israelsk rekord. Under dei olympiske sommarleikane i Aten i 2004 enda han på åttandeplass.

Trass i at han stoppa på 5,70 m i EM-tevlinga 2006 i Göteborg lukkast han å forsvare EM-tittelen frå 2002. Under verdsmeisterskapen i Osaka i 2007 kom han derimot på sjuandeplass, endå om han då tok seg over 5,81 m.

Medaljar og plasseringar i internasjonale meisterskap

• VM 1999 i Sevilla: Bronsemedalje – 5,80 m
• OL 2000 i Sydney: Nr 10 – 5,50 m
• VM 2001 i Edmonton: Sølvmedalje – 5,85 m, bakom Dmitri Markov (6,05 m)
• EM 2002 i München: Gullmedalje – 5.85 m, framom Lars Börgeling (5,80 m)
• VM i 2003 i Paris: Uplassert
• OL 2004 i Athen: Nr 8 – 5,65 m
• EM 2006 i Göteborg: Gullmedalje – 5,70 m, framom to sølvvinnarar (5,65 m)
• VM 2007 i Osaka: Nr 7 – 5,81 m
• OL 2008 i Beijing: Utslått i kvalifiseringa (5,45 m)

Kjelder

• Denne artikkelen bygger på «Alexander Awerbuch» frå Wikipedia på tysk, den 7. september 2014.