Anneliese Dørum
Anneliese Dørum (3. oktober 1939–4. november 2000), fødd Anneliese Parow, var ein norsk lærar og politikar frå Trondheim. Ho representerte Arbeidarpartiet på Stortinget frå 1985 til ho døydde i 2000.
| Anneliese Dørum | |||
| Fødd | 3. oktober 1939 Trondheim | ||
|---|---|---|---|
| Død | 4. november 2000 (61 år) | ||
| Statsborgar av | Noreg | ||
| Parti | Arbeidarpartiet | ||
| Yrke | politikar | ||
| Barn | Knut Dørum | ||
| Alle verv |
| ||
Dørum, som var dotter til ein forretningsmann, utdanna seg til lærar i heimbyen Trondheim. Ho skulte så ved Nordby ungdomsskole på Jessheim frå 1967 til 1980. Deretter var ho politisk sekretær i Akershus Arbeidarparti fram til 1985.
Frå 1972 til -79 sat Dørum to periodar i Ullensaker kommunestyre. Ho kom med i det fyrste direktevalde fylkestinget i Akershus frå 1976 og hadde plass i fylkestinget til 1985. Hausten 1985 vart Dørum vald inn på Stortinget frå Akershus fylke. Fire år tidlegare møtte ho på Stortinget dei to første vekene av stortingssesjonen, i staden for statsråd Einar Førde som gjekk tilbake til Stortinget då den første Brundtland-regjeringa vart avløyst etter å ha tapt stortingsvalet hausten 1981. Dørum vart attvald til Tinget både i 1989, 1993 og 1997. I den første fireårsbolken var ho medlem av Finanskomiteen, som sekretær frå 4. oktober 1988. Perioden 1989-93 var ho medlem av Kommunal- og miljøvernkomiteen, og i den neste, 1993-97, av Kommunalkomiteen. Ho var då elles med i Valkomiteen, noko som vart vidareført etter 1997-valet. Samstundes var ho i si siste stortingsperiode medlem av Kyrkje-, utdannings- og forskningskomiteen.
Dørum døydde hausten 2000, før siste valperioden var over.