Changde

Changde (kinesisk: 常德; pinyin: Chángdé) er eit byprefektur nord i provinsen Hunan i Folkerepublikken Kina, på grensa mot provinsen Hubei. Byprefekturet har eit areal på 18 189 km² og 5 717 218 innbyggjarar i 2010. Av desse budde 1 232 182 menneske i storbyen.

Changde (gul) i Hunan

Satelittfoto av byen Changde

Byprefekturet Changde omfattar to distrikt (区 qū), eitt byfylke (市 shì) og seks fylke (县 xiàn).

Næring

Byen er eit administrativt senter og ein utskipningsstad for olje, korn, bomull, medisinske urter, tekstilar, lær og foredla matvarer.

Samferdsle

Kinas riksveg 207 fører gjennom prefekturet, gjennom fylka Li og Linli og sjølve byen Changde. Denne viktige trafikkåra tek til i Xilinhot i Indre Mongolia nær grensa til Mongolia, går sørover og endar i Hai'an, ein by som ligg i Xuwen fylke sør på Leizhouhalvøya i provinsen Guangdong.

Historie

Byen vart grunnlagt under Han-dynastiet. Han har elvehamn, og var på 1800-talet ein av dei mange byane som etter opiumskrigane vart tvinga til å opne seg for utanrikshandel.

I 1975 vart Changde hardt råka av tyfonen Nina.

Kjelder

• Denne artikkelen bygger på «Changde» frå Wikipedia på bokmål, den 6. mai 2012.

• Denne artikkelen bygger på «Changde» frå Wikipedia på engelsk, den 6. mai 2012.