Eiliv Gudrunsson

Eiliv Gudrunsson (norrønt: Eilífr Goðrúnarson) var ein skald som levde i siste delen av 900-talet.

Eiliv Gudrunsson
Statsborgarskap	Island
Fødd	10. hundreåret
Død	11. hundreåret
Yrke	skribent, skald

Opphavet til skaldskapen: i ørne-ham stal Odin skaldskapsmjøden frå jotnen Suttung, og gav han til æsene og dei folk som kan dikte.
(Illustrasjonen er frå ein biletstein på Gotland)

Han hadde etternamn etter mora (metronym namneskikk, i motsetnad til patronym) noko som skulle tyde på at han vaks opp utan ein far, eller at mora var ei mektig og framståande kvinne. Noko meir om ætta til Eiliv veit vi ikkje, heller ikkje når, eller kvar helst han vart fødd. Han er ikkje nemnd i samtidige kjelder frå Island og ein reknar som mest truleg at han var ein norsk skald.

Eiliv er nemnd i Skaldatal som ein av skaldane hos Håkon Sigurdsson Jarl. Berre få dikt av han er kjende, det viktigaste er Torsdråpa som handlar om den norrøne guden Tor si reise til jotnen Geirrød. Diktet er i drottkvede (dróttkvætt) og fylt med gåtefulle omskrivingar og fantasifulle kjenningar, som gjer det tungt tilgjengeleg.

I eit dikt (halvstrofe) nytta Eiliv ein kjenning for Kristus, og det har vore drøfta om han, ein av skaldane i kretsen rundt Håkon jarl, var blitt ein kristen. Han må i alle høve ha vore kjend med kristendommen.

Alle dei kjende dikta av Eiliv Gudrunsson er funne i Skaldskaparmål i Snorre Edda.

Bakgrunnsstoff

• Det norrøne fyrstediktet av Bjarne Fidjestøl, Bergen 1982
• Den norsk-islandske skjaldedigtning v/Finnur Jónsson (red.), København 1912–15
• Eiliv Gudrunsson Norsk Biografisk leksikon

Kjende dikt av Eilif Gudrunsson

• Torsdråpa Arkivert 2015-06-01 ved Wayback Machine. frå Skaldic Poetry
• Fragment Arkivert 2015-12-28 ved Wayback Machine. frå Skaldic Poetry