Einar Kristian Tveitå
Einar Kristian Tveitå (fødd 22. februar 1973) er ein norsk lege, forskar og tidlegare friidrettsutøvar frå Oslo. Han var noregsmeister i diskoskasting åra 1999-2002. Tveitå var medlem av IL i BUL.
| Einar Kristian Tveitå | |||
| Fødd | 22. februar 1973 | ||
|---|---|---|---|
| Nasjonalitet | Noreg | ||
| Yrke | lege, friidrettsutøvar | ||
Lege
endreTveitå forsvarte avhandlinga «Adhesive capsulitis, hydrodilatation and some aspects of validity regarding shoulder assessments» til doktorgrad (ph.d.) på Institutt for sykehusmedisin ved Universitetet i Oslo i 2010. Han arbeidde på Ullevål sykehus frå 2002 til han i 2008 vart overlege ved Evjeklinikken.
Friidrett
endreTveitå tok steget opp mot noregseliten i diskos-øvinga i 1995-sesongen. Året etter sette han personleg rekord til 59,28 meter ved eit stemne i Helsingborg i Sverige. Sommaren 1998 passerte han 60-metersgrensa i seks tevlingar, lengst nådde han i Oslo den 24. august med 60,82 m. I juli 1999 flytta han sitt personbeste til 61,08 m og 61,31 m innom tre dagar. Ved noregsmeisterskapen 1999 på Byrkjelo sigra han med eit kast på 61,09 m og viste gullgrossist Svein Inge Valvik til sølvplass. Den 4. september 1999, under særs gunstige tilhøve i islandske Hafnarfjörður, flaug diskosen 63,64 m, det aller lengste kastet til Tveitå.
Sidan vann Tveitå NM-gull både i 2000, 2001 og 2002, dei to sistnemnde åra stod han også for årsbeste i øvinga i Noreg. Han kvalifiserte seg til finalen ved VM i friidrett 2001 i Edmonton som tolvtemann med eit kast på 61,85 m. I finalen enda han også på tolvteplass med 59,11 m. Eitt år seinare, då EM i friidrett 2002 vart avvikla i München, nådde han 59,69 m i kvalifiseringa og vart totalt nummer 18.
Medaljar i noregsmeisterskap
endre- 1998 i Askøy: Sølv – 60,67 m, bakom Olav Jenssen (62,00 m)
- 1999 på Byrkjelo: Gull 61,09 m, framom Svein Inge Valvik (60,62 m)
- 2000 på Steinkjer: Gull 59,63 m, framom Svein Inge Valvik (57,70 m)
- 2001 i Drammen: : Gull – 60,15 m, framom Gjøran Sørli (57,88 m)
- 2002 i Sandnes: Gull – 60,29 m, framom Gaute Myklebust (57,49 m)
Personlege rekordar og årsbeste
endre| År | 1995 | 1996 | 1997 | 1998 | 1999 | 2000 | 2001 | 2002 | 2003 |
| Lengde | 57,62 | 59,28 | 58,94 | 60,82 | 63,64 | 61,43 | 62,41 å | 61,45 å | 60,19 |