George W. Bush

George Walker Bush (fødd 6. juli 1946) var presidenten i USA frå 2001 til 2009. Han var tidlegare guvernør i Texas, og er son av tidlegare president George Bush.

George Walker Bush
President i USA
Periode	20. januar 2001-20. januar 2009
Parti	Det republikanske partiet
Fødd	6. juli 1946 i New Haven i Connecticut
Fødestad	New Haven
Mor	Barbara Bush
Far	George H.W. Bush
Ektefelle	Laura Bush
Barn	Jenna og Barbara Bush
Medlem	American Legion
Føregangar	Bill Clinton
Etterfølgjar	Barack Obama

Bush vart fødd i Connecticut, men voks opp i Texas. Han vart etter eit særs jamt val utpeika som president i 2001. Høgsterett i Sambandsstatane avgjorde at røystene i nokre valkrinsar i Florida ikkje skulle teljast om. George Bush var den andre USA-amerikanske presidenten gjennom tidene som var son av ein tidlegare president.

Som president har han mellom anna stått i spissen for USA sin invasjon av Afghanistan, støtta av NATO. Taliban-regimet vart skifta ut. Det vert arbeidd med å innføra eit demokratisk styresett.

Bush sette òg i gang ein invasjon av Irak for å fjerna Saddam Hussein. Invasjonen og okkupasjonen av Irak er mykje omstridd folkerettsleg og politisk.

I den folkelege opinionen i Europa vart George W. Bush rekna for å vera mellom dei minst populære presidentar USA hadde hatt. Han hadde trass i dette stor oppslutnad i USA i periodar, og han vann over utfordraren John Kerry i det amerikanske presidentvalet i 2004. Det var spesielt i sørstatane (som Alabama og Georgia), fjellstatane (som Idaho og Wyoming) og slettestatane (som Nebraska og Kansas) at Bush vann. I nordaust, der det demokratiske partiet tradisjonelt står sterkt, vann ikkje Bush ein einaste stat i 2004. Utover i den andre presidentperioden hans vart han mindre og mindre populær, også blant innbyggjarane i USA.

George W. Bush har gjeve namn til den såkalla Bush-doktrinen i amerikansk utanriks- og tryggingspolitikk.

Bakgrunnsstoff

Wikimedia Commons har multimedia som gjeld: George W. Bush

Engelsk Wikiquote har ei sitatsamling som gjeld: George W. Bush

Kjelder

• en:George W. Bush