Hallingskarvet

Hallingskarvet er ein fjellrygg som ligg i Hol kommune i Viken og Ulvik herad i Vestland. Fjellryggen er om lag 35 km lang og strekkjer seg mellom Geilo og Finse. Det høgste punktet på ryggen er Folarskardnuten på 1933 moh, som òg er det høgste punktet i Buskerud. Det er vid utsikt frå alle kantane av fjellryggen.

Hallingskarvet
fjell
Land	Noreg
Område	Viken, Vestland
Høgd	Folarskardnuten: 1 933 moh.
Koordinatar	60°37′N 7°45′E
Hallingskarvet 60°37′ N 7°45′ E

Sørsida av Hallingskarvet har ei jamn, svakt boga linje, medan nordsida er djupt skoren inn av botnar. To skar går tvers gjennom fjellryggen: Kyrkjedøri i vest og Folarskard lenger aust. Gjennom skara går gamle ferdselsvegar, som nå er varda turistvegar, frå stasjonane Finse og Haugastøl på Bergensbanen. Passpunkta i skara er høvesvis kring 1600 og 1500 moh.

Det er meir vind og tåke i Hallingskarvet enn i Hallingdalsfjella og Hemsedalsfjella. Området er eit eige vêrvarslingsdistrikt. Skarverennet vert arrangert årleg på sørvestsida av Hallingskarvet mellom Finse og Ustaoset.

I 2006 vart Hallingskarvet ein del av Hallingskarvet nasjonalpark.

Prestholtskarvet, den austlege delen av Hallingskarvet, sett frå sør

Kjelder

• «Hallingskarvet» av Geir Thorsnæs og Svein Askheim i Store norske leksikon, snl.no.