Hans Aarnes
Hans Daniel Aarnes (6. mai 1886–25. oktober 1960) var skribent, redaktør og forlagsmann. Han var fødd i Vestrefjord i Haram kommune på Sunnmøre.
| Hans Aarnes | |
| Statsborgarskap | Noreg |
| Fødd | 6. mai 1886 |
| Død |
25. oktober 1960 (74 år) |
| Yrke | journalist |
I ungdomen var Aarnes fiskar og sjømann nokre år. Som journalist og redaktør var han inn om fleire aviser og blad ulike stader i Noreg:
- Ålesund (Aarvak 1905-1911)
- Skien (Norig 1911-1913)
- Odda (Hardanger 1913-1916)
- Bergen (Gula Tidend 1916-1920 og Bondebladet 1921-1923)
- Kristiansan (Agder Tidend 1923-1932)
- Oslo (Nynorsk Vekeblad -1942)
Aarnes var oppteken av å lære andre journalistikk. Etter eit studieopphald i USA starta han, som den første journalistopplæringa i Noreg, Bladmannskulen i 1919. Han skreiv og fleire småbøker til bruk for journalistar.
I 1940 starta Hans Aarnes Fonna Forlag. Han var sentral då dette forlaget starta å gi ut Norsk Allkunnebok, som kom i ti bind frå 1948-1966. Han var og drivkrafta bak dei nynorske teikneseriane Vangsgutane og Ingeniør Knut Berg på eventyr. I 1940 gav han ut Grunnlov for kongeriket Noreg, hans eiga omsetjing av Grunnlova til nynorsk. Aarnes skreiv og gav ut skodespel og diktsamlingar, utan at han har vorte kjend for det.