Harry Kure
Harry Kure (12. april 1928–8. september 2007) var ein norsk fotballspelar frå Fredrikstad som spelte 16 landskampar for Noreg i tida 1951-57 og skåra fem mål.
| Harry Kure | |
| Statsborgarskap | Noreg |
| Fødd | 12. april 1928 Fredrikstad |
| Død | 8. september 2007 (79 år) Sarpsborg kommune |
| Idrett | fotball |
Kure spelte fram til 1951 på Selbak, eit lag som deltok i Hovedserien frå 1949 til -51. Frå 1952 var han vanlegvis venstreving på Sarpsborg Fotballklubb til 1965-sesongen
Kure debuterte på landslaget i august 1951, men måtte vente til 19. mai 1954 før han fekk sin andre landskamp. Han skåra då sitt fyrste av fem landslagsmål, i ein kamp mot Skottland som enda 1-1. To veker seinare vart han matchvinnar då Noreg slo Danmark 2-1 i Malmö, i samband med at den svenske fotballforbundet vart 50 år. Målet kom i 1. ekstraomgang. Gjennom 1954- og 1955 hadde han fast plass på landslaget, medan det vart færre kampar i 1956 og -57. I hans 16. og siste kamp, borte mot Bulgaria i november 1957, tapte dei norske gjestene 0-7 i ein VM-kvalifiseringskamp.
Kure var spesialist på hjørnespark, og skal ha skåra minst åtte mål direkte frå hjørnet, mellom andre to i ein kamp mot Sandefjord Ballklubb. «Han hadde evnen til å gjøre noe som motstanderne ikke ventet, og han scoret mangt et mål nettopp fordi han var påpasselig og kvikk i oppfatningen, og rask til å gripe chansen når den bød seg», skriv Magnus Breili i Fotballboken.
Merittar
endre- NM-sølv: 1964 med Sarpsborg FK
Kjelder
endre- eu-football
- Magnus Breili: Fotballboken, 1967