Johan Ludvig Losting

Johan Ludvig Losting (11. september 1810–31. mars 1876) var ein norsk målar, teiknar og litograf frå Bergen.

Johan Ludvig Losting
Statsborgarskap	Noreg
Fødd	11. september 1810 Bergen
Død	31. mars 1876 (65 år) Bergen
Yrke	illustratør, kunstmålar, grafikar
Johan Ludvig Losting på Commons

Den gamle stortingssalen var teikna av Johan Ludvig Losting

Losting var elev ved Tegneskolen i Christiania frå 1824 til -26. Han begynte som portretteiknar, men utdanna seg til litograf i Tyskland og laga ei rekke prospekt, portrett og anna for Georg Prahl sitt offisin i Bergen.

Til Carl Wilhelm Boeck og Daniel Cornelius Danielssen sitt store verk om leprasykja som kom i 1847, laga Losting 24 kolorerte litografiske plansjar etter akvarellar han sjølv hadde måla. År 1850 budde han ei tid i Paris. Med inntrykk derifrå illustrerte han Hudens sygdomme, eit verk av dei førnemnde to legane og som kom ut i tida 1855-62.

Losting arbeidde i tillegg som teiknelærar, ornamentteiknar, forgyllar, teater-, dekorasjons-, fane- og altertavlemålar. Han teikna dessutan ei mengd landskapsskisser under sine mange reiser i inn- og utland. Gjennom fleire ulike typar tillitsverv arbeidde han iherdig for kulturlivet i Bergen.

Kjelder

• Denne artikkelen bygger på «Johan Ludvig Losting» frå Wikipedia på bokmål, den 10. oktober 2016.