Juzjno-Sakhalinsk

Juzjno-Sakhalinsk; Южно-Сахалинск
	Horisonten til Juzjno-Sakhalinsk
	Byvåpenet til Juzjno-Sakhalinsk
Plassering
Styresmakter
Land	Russland
Føderasjonssubjekt	Sakhalin oblast
Grunnlagd	1882
Borgarmeister	Andrej Lobkin
Geografi
Flatevidd; - By	; 877 km²
Innbyggjarar ; - Totalt (2007); - folketettleik	; 173 200 ; 197,5 /km²
Koordinatar	46°57′0″N 142°44′0″E / 46.95000°N 142.73333°E
Høgd over havet	40 moh.
Tidssone; - Ved sommartid	VLAT (UTC+10); VLAST (UTC+11)
Diverse annan informasjon
Postnummer	693000–693023
Retningsnummer (tlf)	(+7)4242
	Nettstad: yuzhno.sakh.ru/

Juzjno-Sakhalinsk (russisk skrift Ю́жно-Сахали́нск, japansk Toyohara – 豊原) er ein by og administrativt senter i Sakhalin oblast i Russland. Han ligg sør på øya Sakhalin, rundt 6700 km aust for Moskva. Han har om lag 170 000 innbyggjarar (2007).

Historie

Frå den første tida i Vladimirovka.

Busetnaden vart grunnlagt i 1882 som Vladimirovka, og vart bygt av russiske straffangar. Etter Portsmouth-traktaten i september 1905 vart byen hovudstad i det japanske prefekturet Karafuto, og fekk namnet Toyohara (som tyder «Grødedalen»). Portsmouth-traktaten avslutta den russisk-japanske krigen i 1904–1905. Japan vart tildelt den sørlege delen av Sakhalinøya, og leigde Liaodong-halvøya og det russiske jernbanesystemet her i det sørlege Mandsjuria. Etter andre verdskrig vart byen tilbakeført til Russland, og han fekk samstundes det noverande namnet, Juzjno-Sakhalinsk. Den einaste gjenverande japanske bygningen i Juzjno-Sakhalinsk er i dag museum i byen.

Økonomi og næringsliv

Viktige næringar i Jusjno-Sakhalinsk er fiskeindustri, møbelproduksjon, maskinbygging, lettindustri og næringsmiddelindustri. Førekomstar av olje og gass er oppdaga i nærleiken.

I prosjektet Sakhalin II nord på Sakhalinøya er det investert rundt 20 milliardar USD i utbygginga av om lag 150 millionar tonn olje og 500 milliardar kubikkmeter gass. Sør på Sakhalin skal det byggast eit gasshandsamingsanlegg med ein kapasitet på 9,6 millionar tonn per år. Det skal òg byggast ein røyrleidning langs heile øya frå nord til sør.

Juzjno-Sakhalinsk lufthamn ligg 8 km sør for byen.

Utdanning

Juzjno-Sakhalinsk har mange høgare utdanningsinstitusjonar, mellom anna Sakhalin statlege universitet, fleire institutt innan havforsking, ein pedagogisk høgskole, ei avdeling av handelsuniversitetet i Moskva, samt ein høgskule for økonomi, jus og informatikk.

Demografi

Dei fleste innbyggjarane er russarar, men det finst òg ein stor koreansk folkesetnad i byen. Av totalt 43 000 Sakhalin-koreanarar bur om lag halvparten i Juzjno-Sakhalinsk, noko som utgjer 12 % av innbyggjarane i byen. Nokre av innbyggjarane er òg ainoar, nivkhar og orokar.

Kjelder

Denne artikkelen bygger på «Juzjno-Sakhalinsk» frå Wikipedia på bokmål, den 25. desember 2008.

Bakgrunnsstoff

Sakhalin-Portal (engelsk)
Snøstorm i Juzjno-Sakhalinsk^{[daud lenkje]}