Kantjendjunga nasjonalpark

Kantjendjunga nasjonalpark (engelsk Khangchendzonga National Park, tidlegare Kanchenjunga National Park) eller Kantjendjunga biosfærereservat er ein nasjonalpark nord i den indiske delstaten Sikkim som ligg ved fjellet Kantjendjunga i Himalaya og grensar til Kantjendjunga naturvernområde i Nepal i vest. Parken blei skipa 26. august 1977 og dekkjer eit område på 1784 km².^[1]

Kantjendjunga er verdas tredje høgaste fjell, og nasjonalparken har ei høgd over havet på mellom 1830 meter og over 8550 meter. Parken omfattar fleire fjelltoppar, som Pandim i tillegg til Kantjendjunga, isbrear som Zemo- og Simyobreen, og høgfjellsdyr som moskushjort, himalayatahr, treleopard og snøleopard.

Økosystem

Orkidéar i nasjonalparken.

Nedre område av parken har lauvskog med ulike typar eik (Quercus lineata, Quercus lamellosa, Quercus pachyphylla), lønn (Acer Campbellii), magnolia (Magnoilia campbellii), kaneltre (Cinnamomum obtusifolium) og tre som Schima wallichii, Castanopsis, Engelhardtia, Juglans regia og Michelia cathcartii. Over 2 700 meter finn ein blanda skog med furu (Abies densa), gran, einer, lønn, rhododendron og bambus (Arundinaria). Over 3 650 meter veks lågare buskar og urter som Aconitum, Anemone, Primula, Meconopsis, Delhpinium, Iris gentiana og låge einertypar. Fleire plantar er viktige i tradisjonell religion eller medisin, som vendelrota Nardostachys jatamansi, rabarbraen Rheum emodi og ginsengtypen Panax pseudoginseng.

Det finst rundt 550 ulike fugleartar i parken, som blodfasan, satyrtragopan, himalayahøne, himalayagribb og ulike solfuglar, duer, hubroar og ørner.

Av pattedyr kan nemnast kattedyr som leopard, treleopard, snøleopard, bjørnar som asiatisk svartbjørn, leppebjørn og raud panda, sibetkattar, tibetansk villesel, blåsau, moskushjort og himalayatahr. Ein eigen underart av asiatisk villhund lever også her, men er i følgje nylege undersøkingar blitt sjeldne i området.^[2]

Folk i nasjonalparken

Fjelloasset Dzongri La, ein del av nasjonalparken.

Utsyn mot Kantjendjunga frå Goecha La, med bøneflagg i framgrunnen.

Nokre busetnader av lepchafolk, ei innfødd folkegruppe, finst i parken. Elles er parken eit verneområde som ein treng løyve til å vitja. Som regel kan ein få dette saman med ein inngangsbillett. Det finst fleire ruter ein kan gå gjennom parken, til dømes frå Yuksom til Dzongri, Bakim til Goecha-la og Dzongri til Khangerteng. Dei beste tidene å vitja parken på er april-mai og august-oktober. Monsunregn om sommaren og mykje snø om vinteren kan hindra gjennomfart.

Den næraste byen til nasjonalparken er Chungthan, 20 km unna, og den næraste storbyen er Gangtok, hovudstaden i Sikkim.

Bakgrunnsstoff

Oversyn over parken og registrerte artar Arkivert 2014-03-27 ved Wayback Machine. ved HKH Conservation Portal

Kjelder

↑ Parks and Sanctuaries, sikkimtourism.gov.in
↑ Bashir, T. A. W. Q. I. R., et al. Precarious status of the Endangered dhole Cuon alpinus in the high elevation Eastern Himalayan habitats of Khangchendzonga Biosphere Reserve, Sikkim, India. Oryx (2013): 1-8.

Khangchendzonga National Park, WebIndia123
Flora & Fauna Arkivert 2014-07-18 ved Wayback Machine., knpsikkim.in

Denne artikkelen bygger på «Khangchendzonga National Park» frå Wikipedia på engelsk, den 27. mars 2014.

[1] Parks and Sanctuaries, sikkimtourism.gov.in

[2] Bashir, T. A. W. Q. I. R., et al. Precarious status of the Endangered dhole Cuon alpinus in the high elevation Eastern Himalayan habitats of Khangchendzonga Biosphere Reserve, Sikkim, India. Oryx (2013): 1-8.

[1]

[2]