Knud Bull

Knud Geelmuyden Bull (10. september 1811–23. desember 1889) var ein norsk-australsk målar som var bror av fiolinisten og komponisten Ole Bull og arkitekten Georg Andreas Bull.

Knud Bull
Statsborgarskap	Noreg
Fødd	10. september 1811 Bergen
Død	23. desember 1889 (78 år) Sydney
Yrke	kunstmålar
Knud Bull på Commons

View of Hobart Town (1853)

Han fekk truleg den første målarutdanninga si i København, og fekk seinare ein del undervising hjå Jacob Calmeyer i Bergen. I 1833–34 var han elev av J.C. Dahl i Dresden.

I 1845 drog han frå Stockholm til Storbritannia, der han laga ei trykkplate for 100 spesidalar for å kunna produsere falske norske pengesetlar. Han blei avslørt, stilt for retten og dømd til forvising til Australia i 14 år. I 1846 kom han til straffekolonien på Norfolkøya vest for Australia. Året etter blei han flytta til Tasmania. I 1853 blei han frigjeven, men blei som mange andre forviste fangar verande i Australia. Han slo seg ned i Hobart, der han etablerte seg som profesjonell landskapsmålar.

Han flytta til Sydney i 1856. Året etter blei han tatt for sjekkforfalsking, men frifunnen på grunn av mangel på bevis. I åra som følgde gav han undervising og tok diverse tilfeldig arbeid, men måla lite sjølv.

Knud Bull er rekna som ein pioner innan australsk målarkunst. Han er representert i alle dei sentrale musea i Australia. Berre nokre få verk av han er kjende frå Noreg.

Galleri

• 
  Tuengen i Vestre Aker (1836)
• 
  Portrett av Christopher Malthe (1830)
• 
  The wreck of 'George the Third' (1850)

Bakgrunnsstoff

• Norsk kunstnerleksikon, b. 1 : A-G, side 354-355, digital utgåve
• Ragnar Kvam jr. Straffen Gyldendal 1999.
• Familens sorte får. Aftenposten Historie Nr. 2 2019. s. 66-71