Lars Ramndal
Lars Ramndal (5. mai 1893–11. august 1971) var ein norsk gardbrukar, fiskar og politikar frå Mosterøy. Han representerte partiet Venstre på Stortinget frå 1945 til 1965.
| Lars Ramndal | |
 | |
| Statsborgarskap | Noreg |
| Fødd | 6. mai 1893 |
| Død |
8. november 1971 (78 år) |
| Yrke | politikar |
| Språk | norsk |
| Politisk parti | Venstre |
| Lars Ramndal på Commons | |
Ramndal var fødd i Rennesøy, men foreldra flytta til Mosterøy då han var eitt år gammal. Foreldra dreiv sidan garden Dyskeland, farsgarden til mor hans. Sjølv var han forretningsførar for Mosterøy trygdekasse og heradskasserar i Mosterøy frå høvesvis 1911 og -12 til 1917. I åra frå 1917 til 26 livnærde han seg som fiskar. Han var formann 1925-39 i Rogaland fiskarlag, 1927-36 i Rogaland brislingfiskarlag og 1934-36 i Notfiskarsamskipnaden. I 1926 tok han over slektsgarden Dyskeland og dreiv denne i mange år.
Ramndal var varaordførar i Mosterøy herad 1922-25 og ordførar 1932-41 og 1945. Partipolitisk sokna han på 1920-talet til Bondepartiet, men braut med partiet før stortingsvalet 1927. Han melde seg inn i Venstre og stod på vallister for partiet i 1930-åra, utan å oppnå stortingsplass. Under andre verdskrigen vart han arrestert i april 1944. Han sat fengsla lokalt til han 1. juni 1944 vart overført til Berg interneringsleir i Østfold. I frigjeringsdagane i mai 1945 var han sett fri.
Frå hausten 1945 til 1965 var Ramndal stortingsrepresentant frå Rogaland og Venstre. I heile denne 20-årsperioden var han formann i Justiskomiteen. Han var elles medlem i landsstyret i Venstre frå 1945 til han i 1950 vart vald til nestformann, ein posisjon han hadde i to år.
Ramndal deltok aktivt i ungdoms-, fråhalds- og kristeleg arbeid. Han var medarbeidar 1945-56 i Norsk Misjonstidende og formann 1957-61 i Landsnemnda til Avholdsfolket.