Martina Ertl-Renz
Martina Ertl-Renz (fødd 12. september 1973) er ein tysk tidlegare alpinist frå Lenggries i Bayern som vann to gullmedaljar i VM i alpine greiner, i høvesvis kombinasjonen i 2001 og i lagtevlinga i 2005. Ho vart nummer to i verdscupen i alpine greiner i både 1996 og 1998.
| Martina Ertl-Renz | |
| Statsborgarskap | Tyskland |
| Fødd | 12. september 1973 (51 år) Bad Tölz |
| Idrett | alpint |
| Tok del i | Vinter-OL 2006, Vinter-OL 1992, Vinter-OL 1994, Vinter-OL 1998, Vinter-OL 2002 |
Aktiv
endreErtl tok bronsemedaljen i storslalåm under VM i alpine greiner 1993 i Morioka i Japan. Ho fekk sitt definitive gjennombrot i 1994-sesongen med OL-sølv på Lillehammer og sin fyrste verdscupsiger på tampen av sesongen i Vail i USA, storslalåm-tevlingar begge.
Under VM i alpine greiner 1996 kopierte ho prestasjonen i storslalåm frå forrige VM og tok ein ny bronsemedalje. Dei neste åra tok ho meisterskapsmedaljar i kombinasjonsgreina; fyrst OL-sølv i 1998, deretter VM-gull i St. Anton i 2001 og OL-bronse i 2002. I 2005 var ho med på Tysklands lag som vann lag-tevlinga i alpint-VM i Bormio. Både ho og den to år yngre broren Andreas Ertl var sentrale på laget, som saman med Hilde Gerg, Florian Eckert, Felix Neureuther og Monika Bergmann sikra tysk gull.
Både i 1996 og 1998 enda Ertl på andreplassen i verdscupen i alpine greiner, begge gongane måtte ho sjå seg slått av landskvinna Katja Seizinger. I begge dei to nemnde sesongane vann Ertl pokalen som beste storslalåmrennar i verdscupen i alpine greiner. Mellom 1994 og oktober 2003 sigra ho i 14 verdscuprenn i tre ulike øvingar. 57 gongar stod ho på sigerspallen.
Ertl vann 13 tyske skimeisterskap. Ho la opp i 2006.
Kjelder
endre- Sportsboken, aktuelle årgangar
- Denne artikkelen bygger på «Martina Ert-Renz» frå Wikipedia på tysk, den 20. november 2014.
Bakgrunnsstoff
endre- «Martina Ertl-Renz». olympedia.org. Henta 15. november 2022.