Mona-Lisa Pursiainen
Eivor Mona-Lisa Pursiainen, fødd Strandvall, (21. juni 1951–7. august 2000) var ein finsk sprintar frå Kronoby som vann bronsemedaljen på 200 meter ved EM i friidrett 1974, der ho også fekk sølv med det finske mannskapet i 4 x 400 meter stafett.
| Mona-Lisa Pursiainen | |
|
| |
| Statsborgarskap | Finland |
| Fødd | 21. juni 1951 Kronoby |
| Død | 7. august 2000 (49 år) Grankulla |
| Idrett | 100 meter sprint, 200 meter, 400 meter, 4 x 100 meter stafett, 4 × 400 meter stafett |
| Tok del i | Sommar-OL 1972, Sommar-OL 1976, EM i friidrett 1969, EM i friidrett 1971, EM i friidrett 1974, EM i friidrett innendørs 1973, EM i friidrett innendørs 1974, EM i friidrett innendørs 1976, Sommeruniversiaden 1973, Sommeruniversiaden 1975 |
| Utmerkingar | Finnish Sports Personality of the Year |
Karriere
endreStrandvall/Pursiainen vann 14 individuelle gullmedaljar i finske meisterskap. Ni kom på 100 meter i periodane 1967–1970 og 1973–1977, fire på 200 meter i perioden 1967–1970 og eitt på 400 meter i 1970. I tillegg var ho med på å vinne 12 gullmedaljar i stafettløp. Frå 1966 til 1978 deltok ho i samtlege landskampar mellom Finland og Sverige.
Pursiainen var på sitt aller beste i 1973. Ved universiaden i Moskva sigra ho både 100 meter og 200 meter. Vinnartida 22,39 sekund på 200 meter er framleis finsk rekord, femti år seinare. Under europameisterskapen 1974 i Roma sprang ho inn til bronse på 200 m og sjetteplass på 100 m. I den avsluttande 4 x 400 m stafett tok ho seg av den andre etappen då Finland kom i mål til sølv.
Ho deltok også i EM i friidrett 1969 i Aten, EM i friidrett 1971 i Helsinki, Sommar-OL 1972 i München og Sommar-OL 1976 i Montréal, utan å kvalifisere seg til ein individuell finale. I 4 × 400 meter stafett var ho derimot med på å springe Finland til åttandeplass i 1969, sjuandeplass i 1971 og 1972 og sjetteplass i 1976.
Purisiainen sette 21 finske rekordar, fordelt på distansane 100, 200 og 400 meter. I 1973 vart ho kåra til årets idrettsutøvar i Finland, som den aller fyrste kvinna.
Pursiainen døydde av brystkreft, etter å ha vore sjuk i fleire år.
Kjelder
endre- Denne artikkelen bygger på «Mona-Lisa Pursiainen» frå Wikipedia på finsk, den 2. september 2023.
