Nanna Thrane
Nanna Thrane (fødd 21. august 1854, død 29. mars 1948) var ein norsk forfattar. Ho skreiv noveller og romanar.
| Nanna Thrane | |
| Statsborgarskap | Noreg |
| Fødd | 21. august 1854 Lillehammer kommune |
| Død |
29. mars 1948 (93 år) |
| Yrke | forfattar, skribent |
| Nanna Thrane på Commons | |
Bakgrunn og familie endre
Nanna Thrane vart fødd 21. august 1854. Ho var dotter av offiser Paul Conrad Clausen Thrane (1818-1861) og Marthe Kristine Thrane, fødd Schnitler (fødd 1830).[1] Faren Paul var soneson av Paul Olsen Thrane, kjøpmann og eigar av Borregaard Hovudgard. Faren var òg fetter av arbeidarleiaren Marcus Thrane.[2][3]
Thrane var den eldste av fem sysken; tre døtrer og to søner. Systera Ragnhild Thrane (1853-1913) vart ein dugeleg portrettmalar.[4] Faren døydde medan borna var små, og familien flytta deretter til Thranes mormor Kristina Margareta Schnitler (fødd 1805) på Lillehammer. Her budde òg Thranes tre ugifte tantar. Etter nokre år flytta Thranes mor med borna til Christiania. Her tok Thranes brør utdanning og gifta seg. Thrane og hennes to systrer vart verande ugifte og budde heime hos mora.[5] Mora og systera Ragnhild døydde i høvesvis 1911 og 1913, men Thrane og den yngste systera Ellisif heldt fram å bu saman til òg sistnemnde daude. Thrane døydde i 1946, nesten 94 år gammal.[6]
Forfattarskap endre
Thranes forfattarskap strekkjer seg frå 1892 til 1917. Ho debuterte som forfattar i 1892 med novellesamlinga Hos tarvelige folk, utgjeve på Cammermeyers forlag. Dei neste to romanane hennar vart òg utgjeven på små Kristiania-forlag. Dei vart alle utgjeve i små opplag, og vart ikkje trykt opp att seinare. Etter at Thranes tre første bøker vart utgjeve i 1890-åra tok ho fleire års pause frå skrivinga. Mellom 1910 og 1917 gav ho derimot ut romanar kvart eller annakvart år. Alle desse vart utgjevne på Gyldendal.[7]
Thrane skreiv både noveller og romanar. Romanane hennar har som regel ein munter grunntone og er ofte morosame, medan novellene er meir dystre og pessimistiske. Medan novellene er lagt til samtida, føregår handlinga i romanane nokre generasjonar tilbake, på slutten av 1700-talet. Det er tydeleg at Thrane brukar si eiga familiehistorie, som ho var svært interessert i, når ho skriv dei historiske romanane. Blant anna har ho truleg brukt mormora sin ungdom som mal for ein av romanane.[8]
Eit gjennomgåande tema i Thranes bøkar er kvinner og skjebnane deira. Kvinnene i bøkene lid ofte materiell naud, eller det vanskelege ved ikkje å sjølv kunna få rå over sit eige liv vert skildra, som til dømes Jomfru Kirstine Germeten (1910), der 15 år gamle Kirstine vert gifta bort av foreldra til ein eldre mann. Thranes litterære kvinneskikkelsar vert oppseda til å vera milde og tålmodige, men ynskjer mest av alt å få vera seg sjølv og avgjera over sit eige liv. Nokre av dei oppnår dette, medan andre må leva i tråd med forventingane til foreldra og samfunnet.[9]
For ettertida er Nanna Thrane ein lite kjend forfattar.[10]
Thrane skreiv òg artiklar for bladet Urd, blant anna eit intervju med fjellklatraren Therese Bertheau.[11]
Bibliografi endre
- Hos tarvelige folk, Cammermeyer, Kristiania 1892
- Et muntert Hus, Breien, Kristiania 1896
- Nær Midnat: en Akt og fem Skitser, Bigler, Kristiania 1897
- Jomfru Kirstine Germeten: en Fortælling fra den gamle Kapteinsgaard, Gyldendal, Kristiania 1910
- Løitnant Meisner: Christiania Interiør fra Slutningen af det 18de Aarhundrede, Gyldendal, Kristiania 1911
- Den sidste Sølvske: en gammel Historie, Gyldendal, Kristiania 1912
- Hjertets stemme, Gyldendal, Kristiania 1913
- Bente Heires Roman, Gyldendal, Kristiania 1915
- Naadsensaaret, Gyldendal, Kristiania 1917
Sjå òg endre
- Thrane
Referansar endre
- ↑ Haaland, Mogens (1933) (1980). En glemt forfatterinne: Nanna Thrane, (1854-1948). forfatteren. s. 1.
- ↑ Boye, Else. (2009, 13. februar).
- ↑ Arntzen, Jon Gunnar & Bratberg, Terje. (2017, 20. august).
- ↑ Wichstrøm, Anne. (2015, 30. november).
- ↑ Haaland, Mogens (1933) (1980). En glemt forfatterinne: Nanna Thrane, (1854-1948). forfatteren. s. 1-3.
- ↑ Haaland, Mogens (1933) (1980). En glemt forfatterinne: Nanna Thrane, (1854-1948). forfatteren. s. 9.
- ↑ Haaland, Mogens (1933) (1980). En glemt forfatterinne: Nanna Thrane, (1854-1948). forfatteren. s. 3-4.
- ↑ Haaland, Mogens (1933) (1980). En glemt forfatterinne: Nanna Thrane, (1854-1948). forfatteren. s. 8-9.
- ↑ Haaland, Mogens (1933) (1980). En glemt forfatterinne: Nanna Thrane, (1854-1948). forfatteren. s. 5-7.
- ↑ Haaland, Mogens (1933) (1980). En glemt forfatterinne: Nanna Thrane, (1854-1948). forfatteren. s. 9-10.
- ↑ Urd. 1902. A/S Urd. 1902. s. 109-112.