Nikolaj Benois

Nikolaj Leontjevitsj Benois (13. juli 1813–23. desember 1898) var ein russisk arkitekt som arbeidde i Peterhof og andre forstader til St. Petersburg.

Nikolaj Benois
Fødenamn	Николай Леонтьевич Бенуа
Statsborgarskap	Det russiske imperiet
Fødd	1. juli 1813 St. Petersburg
Død	11. desember 1898 (85 år) St. Petersburg
Yrke	arkitekt
Språk	russisk, finsk
Far	Louis César Benois
Mor	Anna Katarina Christina Concordia Groppe
Ektefelle	Kamilla Cavos
Nikolaj Benois på Commons

Liv og gjerning

Benois vart fødd i St. Petersburg som son av Anna Katarina (Groppe), som var av tysk avstamming, og Louis Jules Benois frå Brie i Frankrike. Han studerte ved St. Petersburgs kunstakademi frå 1827 til 1836. Åtte år seinare var han av tsar Nikolaj I utnemnd til hoffarkitekt og fekk då oppsyn med fleire byggeprosjekt i byen Peterhof, i særleg grad med stallane til keisaren (1847-52).

Benois teikna nokre av dei fyrste jarnbanestasjonane i Russland, fram om alt i Strelna, Tsarskoje Selo, og nye Peterhof. Den siste vert rekna for meisterstykket hans. I 1800-talets Russland var Benois kjend for å vere tilhengar av nygotisk stil i arkitektur og utsmykking.

Nye Peterhof jarnbanestasjon, teikna av Nikolaj Benois. Foto frå før 1917

Benois hadde tre søner som alle vart lagd merke til i si samtid. Aleksandr Benois var målar og er særleg kjend som scenograf. Også Albert Benois var målar, medan Leon Benois var ein kjend arkitekt. Mellom barneborna hans fann ein kunstnarande Jevgenij Lanceraj og Zinaida Serebrjakova. Skodespelaren Peter Ustinov var eit oldebarn.

Kjelder

• Denne artikkelen bygger på «Nicholas Benois» frå Wikipedia på engelsk, den 14. april 2010.