Ole Jacob Sparre
Ole Jacob Louis Sparre (6. november 1831–4. november 1889) var ein norsk lege og stortingsmann frå Christiania. Han var medlem av Stortingets Venstreforening, som vart skipa i 1883. Christian Sparre var sonen hans.
| Ole Jacob Sparre | |
| Statsborgarskap | Noreg |
| Fødd | 6. november 1831 Christiania |
| Død |
4. november 1889 (57 år) |
| Yrke | politikar, lege |
| Språk | norsk |
| Medlem av | Norsk Kvinnesaksforening |
Sparre var son til ein offiser. Sjølv vart han student frå Christiania katedralskole i 1850 og cand. med. i 1856. Dei neste fire åra var han privatlege i Aurskog og seinare i Høland. Han var distriktslege i Rollag 1860-63 og i Strandebarm 1863-75, for ytre Hardanger. I 1876 vart han tilsett stadsfysikus i Bergen, frå 1879 også lege for Bergens Tukthus. Som stadsfysikus fekk han i stand store forbetringar i renovasjonsstellet for byen.
Sparre var ordførar i Rollag. I Bergen var han medlem av formannskapet frå 1880. Han var styreformann for Bergens kommunale sjukehus, samt formann i kontrollnemnda for sinnssjukehuset i byen.
Sparre representerte Søndre Bergenhus amt på Stortinget 1874-76. Sidan representerte han valkrinsen Bergen frå 1883 til han vart permittert 10. mai 1889. Perioden 1874-76 var han sekretær i gasje- og pensjonskomiteen. Han hadde same posisjonen i protokollkomiteen 1883-85, og var formann for denne komiteen 1886-89. Sparre var også medlem av valkomiteen 1886-89 og av fullmaktskomiteen i 1889 til han grunna sjukdom fekk permisjon. Han døydde i Kristiania i 1889.
Kjelder
endre- Lindstøl, Tallak: Stortinget og Statsraadet 1814-1914. Kristiania, 1914
- Biografisk informasjon om Ole Jacob Sparre NSD Norsk senter for forskningsdatas politikararkiv