Påskekylling

Påskekylling er ein kylling brukt som symbol og pynt i samband med påsken. Som påskeegg er kyllingar eit symbol på grøderikdom og nytt liv, både innan heidensk og kristen tradisjon. Kyllingar er også eit vårteikn ettersom både egg- og kyllingproduksjon tidlegare gjerne stoppa opp om vinteren.

Påskekyllingar på seljekvistar på eit norsk postkort frå rundt 1947.

Dekorasjon

Påskekyllingpynt på påskeegg.

Kylling fotografert for eit russisk påskekort.

Kyllingar, høns og hanar har vore vanlege motiv på påskekort på heile 1900-talet. Ein kan avbilda naturlege eller meir menneskeleggjorte kyllingar.

• 
  Påskekort frå USA frå rundt 1910.
• 
  Russisk postkort frå tidleg på 1900-talet viser kyllingar som køyrer bil.
• 
  Gresk påskekort frå 1918.
• 
  Dansande kyllingar på eit svensk kort av Hedvig Rosendahl.
• 
  Hane og kyllingar på eit norsk påskekort frå 1928.

Mange bruker også kyllingar som påskepynt. Dei kan til dømes vera laga av garn, stoff, fiber, piperensarar eller ståltråd med gult syntetisk fiber som dun.

Levande kyllingar

Ein kan også markera påsken med levande kyllingar. Nokre klekker ut kyllingar til påsken, til dømes som eit barnehageprosjekt eller til ein besøksgard. Mange slike gardar og ein del utandørsmuseum feirar påske med mellom anna levande kyllingar.

Andre gjev kyllingar som gåve til born. Nokre stader farger ein tilmed kyllingane slik at dei skal bli like fargerike som påskeegga. Skikken med å behandla levande dyr som leiker eller dekorasjon er blitt kraftig kritisert, og ein blir sterk frårådd å kjøpa kyllingar om ein ikkje har ein plan for dei seinare.

Mat

Simnelkake pynta med påskekyllingar.

Som med andre motiv er det vanleg å ha kyllingforma mat og godteri til påske. Mange stader kan ein laga ulike kaker forma som kyllingar. I tillegg til sjokoladeegg blir det også laga mange kyllingar og kaninar av sjokolade til påske. I USA og Canada er Peeps, fargerike marshmallowgodteri, utbreidde til å ha i påskekorger.

Ein kan også ha kylling som påskerett i staden for til dømes lam.