Paul Aklestad
Paul Andreas Jetmundsen Aklestad (18. desember 1837–21. mai 1924) var ein norsk lærar, gardbrukar og politikar som representerte Venstre på Stortinget frå 1889 til 1909.
| Paul Aklestad | |||
| Fødd | 18. desember 1837 Hjørundfjord | ||
|---|---|---|---|
| Død | 21. mai 1924 (86 år) | ||
| Statsborgar av | Noreg | ||
| Parti | Venstre | ||
| Yrke | politikar, lærar, bonde, omgangsskolelærer | ||
| Alle verv |
| ||
Paul Aklestad var fødd på Aklestad i Hjørundfjord i noverande Ørsta kommune. Han gjekk i lære 6 veker ein vinter hos klokkar Lars Olaus Strømme på garden Haukås i Ørskog, for å bli lærar, og vert deretter tilsett som lærar i Hjørundfjord frå 1854.[1] Han arbeidde som omgangsskulelærar til 1863.[2] I åra 1863 til 1871 dreiv han bnr 2 på Kvistad. I 1871 fekk han kjøpe farsgarden på Aklestad frå den eldre broren Ingebrigt.[2]
Aklestad kom tidleg med i heradsstyringa i Hjørundfjord kommune. I åra 1866 til 1910 var han medlem i heradsstyret, og ordførar i åra 1870-1898.[3] Han hadde også elles stor tiltru hos sine sambygdingar, og vart nytta i alle slags tillistverv. Han var til dømes formann og kasserar i Hjørundfjord Sparebank frå skipinga i 1880 til 1889. [4]
Paul Aklestad vart vald inn på Stortinget frå Romsdals Amt i 1889, og vart attvald 6 gongar deretter, og sat på Stortinget til 1909. [5]
Paul Aklestad sat heile tida han var på Stortinget i den såkalla Gasje- og pensjonskomiteen, frå 1892 til 1904 som sekretær og seinare som formann. På Stortinget var han ein typisk sparepolitikar, kanskje den mest typiske etter Søren Jaabæk. Denne grunnhaldninga kom fram alt i jomfrutalen hans på Stortinget, der han skal ha sagt: «Det er et ord som heter sparsommelighed.»[6]
I juni 1861 gifta han seg med Berte Johanne Olsdatter Skylstad (1840–1922), frå Skylstad i Hjørundfjord. Dei fekk 13 born. Av desse døydde 5 straks dei var fødde, 8 levde opp.[7][8]
Kjelder
endre- Ivar Grøvik: Hjørundfjordboka Kultursoga II, Ørsta kommune 1977
- Lars Strømme og Ragnar Standal: Hjørundfjordboka Band V Gard og ætt, Ørsta kommune 1993
- Fotnotar
- ↑ Grøvik, s. 148, 149, 152
- ↑ 2,0 2,1 Strømme og Standal, s. 206
- ↑ Grøvik, s. 382-384
- ↑ Grøvik, s. 502-506
- ↑ «Paul Andreas Jetmundsen Aklestad». NSD. Arkivert frå originalen 27. mai 2011. Henta 12. mars 2009.
- ↑ Grøvik, s. 382-383
- ↑ Strømme og Standal, s. 207
- ↑ Genealogy, arkivert frå originalen 19. mai 2011, henta 30. oktober 2009