Petter Furberg
Petter Furberg (15. desember 1923–22. juni 1999) var ein norsk arbeidar og stortingsrepresentant frå Sande i Vestfold. Han møtte på Stortinget i tida 1969 til 1981, vald for Arbeidarpartiet.
| Petter Furberg | |||
| Fødd | 15. desember 1923 Sande | ||
|---|---|---|---|
| Død | 22. juni 1999 (75 år) | ||
| Statsborgar av | Noreg | ||
| Parti | Arbeidarpartiet | ||
| Yrke | politikar | ||
| Alle verv |
| ||
Furberg var son til ein garvar. Sjølv var han i 1941-42 jord- og skogbruksarbeidar i Sverige. Frå 1943 til 1946 arbeidde han i den norske handelsflåten. Etter radiotelegrafisteksamen i 1948 fekk han jobb på Jan Mayen i eitt år, 1949-50, også i 1957-58 var han Jan Mayen, då som styrar av stasjonen. Tida 1950-52 var han akkumulatorarbeidar, deretter tilsett ved Marinens hovedverft i Horten, der han var både støyperiarbeidar, kranførar og arbeidsstudiemann. Frå 1965 var han kalkulatør ved Marinens hovedverft.
Furberg var medlem av bystyret i Horten i tida 1953-71. Hausten 1969 vart han vald til å representere Vestfold fylke og Arbeidarpartiet på Stortinget. Gjennom to attval vart han verande tingmann i tolv år. Valbolken 1969-73 var han medlem i Landbrukskomitéen. Frå 1973 til 1981 hadde han sete i Justiskomitéen, som sekretær frå januar 1976 til september 1977 og nestformann oktober 1977 til februar 1981. Rokeringar då Gro Harlem Brundtland danna si fyrste regjering, førte til at han vart sekretær i same komite dei siste månadene på Stortinget.
Frå 1981 til 1990 var Furberg riksrevisor og leiar av Riksrevisjonen. Han døydde i Horten.