Raudøyna i Ørsta

Raudøyna er ei øy og ein matrikkelgard i Ørsta kommune på Sunnmøre. Ho har eit eit flatemål på om lag 394 daa, dvs. litt mindre enn 0,4 kvadratkilometer.

Raudøyna
Raudøyna med Raudøyholmen. Yksnøya bak til venstre. Gurskøya heilt bak.
Geografi
Stad	Ørsta kommune
Koordinatar	62°14′10,9″N 05°57′57,8″E
Areal	0,4 km²
Administrasjon
Land	Noreg
Fylke	Møre og Romsdal
Demografi
Folketal	0

Øya er relativt lang og smal, om lag 1,7 km lang og om lag 370 m brei på det breiaste, og nesten delt på midten, der den er berre ca. 50 m på det smalaste. Dei to delane av øya er om lag like store i areal.

Nord for Raudøyna ligg den ca. 31 daa store Raudøyholmen, og den vesle holmen Blæja på ca. 2 daa.

Raudøyna ligg midt i utlaupet av Ørstafjorden, rett sør og vest for Liadalsbygda på den eine sida av fjorden og rett nord for Steinnes på den andre sida. Avstanden til Liadalsbygda er ca. 700 m på det kortaste, og om lag 600 m over til Steinnes på den andre sida. Nordaustover frå øya ligg Vartdalsfjorden, som sørvest for øya går over i utlaupet til Voldsfjorden og held fram som Rovdefjorden.

Heile Raudøyna er freda, som Raudøya landskapsvernområde og Raudøya naturreservat. Grunnlaget for fredinga er mellom anna den store førekomsten av kristtorn på øya. Det er òg særs mange fornminne på øya, mellom andre Kjemperøysa (sjå kjelder) der truleg holmgangsmannen Ljot den bleike vart gravlagt.

Raudøya er gardsnummer 64 i Ørsta. Her har vore 3 bruk på øya, men ingen av dei er i drift no, og øya har ikkje hatt fast busette sidan 1950-talet. Det har også budd folk på Raudøyholmen.

Utsikt til Raudøyna sett frå Liadalsnipa i Ørsta

Namn

Namnet er eit vanleg øynamn, og siktar truleg til ein raudaktig bergart.

Folketalsutvikling:

1801	1900
9	14

Kjelder

• Bjørn Jonson Dale: Ørstingar II Ættebok for Ørsta 1900-1998, Ørsta 1999 ISBN 82-91790-02-7, side 813-814.
• Raudøyna i Ørsta i kulturminnesok.no, nettstaden til Riksantikvaren