Sivsongar

Sivsongar (Acrocephalus schoenobaenus) er ein sporvefugl som høyrer til kjerrsongarfamilien, Acrocephalidae, og som tidlegare vart plassert i songarfamilien. I daglegtalen vert sivsongaren framleis rekna som songar sjølv om vitskapen har vist at sivsongar og gruppa Sylvia-songarar ikkje har ei sams biologisk avstamming.

Sivsongar
Sivsongar
Utbreiing og status
Status i verda: Livskraftig Utbreiinga av Sivsongar
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Sporvefuglar Passeriformes
Familie:	Kjerrsongarfamilien Acrocephalidae
Slekt:	Kjerrsongarar Acrocephalus
Art:	Sivsongar A. schoenobaenus
Vitskapleg namn
Acrocephalus schoenobaenus Linnaeus, 1758

Utsjånad og lyd

Læte

Sivsongaren er ein middelsstor songar, 11,5 til 13 cm lang. Vengebreidda er frå 17 til 21 cm og vekta om lag 10-15 gram. Den vaksne fuglen har ein kraftig streka brungrå rygg og lys gulaktig underside. Panna er jamn med eit framtredande kvitaktig augebryn, og issen er brunsvart. Strupa er kvitaktig og nebben er kraftig og spiss. Kjønna er like, slik som hos dei fleste andre songarar. Ungfuglane er flekkete på brystet. Songen er svært omvekslande og består av eit raskt, snerrande jirra-jirra-jirra avbrote av typiske kvislelydar og hermelåt.

Utbreiing

Fuglen hekkar i nesten heile Europa og i det vestlege og sentrale Asia.

Biotop, leveområde i Noreg og trekkvanar

Sivsongaren er vanlegast i Nord-Noreg, der han gjerne held til i våtmarker og vierkratt. I Sør-Noreg er han mest knytt til kysten der han vel seg stader med mykje busker, samt takrørsjøane rundt Oslofjorden. Fuglen er ein nykomling i Sør-Noreg, då det fanst lite av han før enn i det 20. hundreåret. Den norske hekkebestanden er rekna å ligge mellom 10 000 og 100 000 par. Sivsongaren er trekkfugl og overvintrar i det tropiske og sørlege Afrika. Dei norske fuglane overvintrar helst vest i dette området. Fuglane dreg sørover i august, nokre allereie i slutten av juli, og nokre utover i september. For å klare den lange flygeturen samlar fuglen feittreservar.

Hekking

Sivsongaren vert kjønnsmoden etter eit år. Hoa legg 3-6 egg i eit reir nær marka i tett vegetasjon, i blant i ei buske. Foreldra, som oftast hoa, ruger i 12-14 dagar. Ungane vert flygeferdige etter 10-12 dagar. Sivsongaren kan bli opp til sju år gammal.

Føde

Som dei fleste andre songarar et sivsongaren insekter, men kan også ete anna smått som edderkoppar, sniglar og bær.

Kjelder

• Denne artikkelen bygger på «Sävsångare» frå Wikipedia på svensk og på «Sivsanger» frå Wikipedia på bokmål
• Norsk Fugleatlas, 1994.
• Sedge Warbler i engelskspråkiga Wikipedia 10 augusti 2005
• Schilfrohrsänger i tyskspråkiga Wikipedia 10 augusti 2005
• Nordens fåglar av Roland Staav och Thord Fransson, andra upplagan, Stockholm 1991 ISBN 91-1-913142-9

Bakgrunnsstoff

• P2 - Sävsångare
• Dansk ornitologisk forening

Wikimedia Commons har multimedia som gjeld: Sivsongar