Stearin

kjemisk sambinding
Den kjemiske strukturen til stearin.

Stearin (eller tristearin) er eit lukt- og smakfritt feittstoff som er fast ved romtemperatur.[1] Det er ein glyserolester av stearinsyre og har formel (C17H35COO)3C3H5. Smeltepunktet er 72 °C.

Ordet «stearin» kjem frå gresk stear som tyder «talg». Stearin er ein av dei viktigaste delane av fleire feittypar frå plantar og dyr, som talg og kakaofeitt.[1]

Ein kan framstilla stearin ved katalytisk hydrogenering av oljer, eller av stearinsyre og glyserol med aluminiumoksid (Al2O3) til stades.[1]

Stearin var tidlegare den vanlegaste komponenten i levande lys. Lys av rein stearin blir for sprøe, derfor blir moderne stearinlys som regel også tilsette fast parafin (parafinvoks). Lys av berre parafin blei for blaute.[2] Stearin kan også brukast som feittkomponent i såpe.

Feittstoffet er framstilt frå levande organismar, for eksempel oljehaldige planteslag som palme, eller som eit biprodukt i kjøtproduksjon. Jo meir feitt det er i stearinen, desto fastare er konsistensen ved romtemperatur.

KjelderEndra

  1. 1,0 1,1 1,2 «Stearin: kjemi» (15. februar 2009). Store norske leksikon. Fri artikkel henta 15. juli 2015.
  2. «Stearin: teknikk» (15. februar 2009) Store norske leksikon. Fri artikkel henta 15. juli 2015.