Venstrepartiet dei grøne

Venstrepartiet dei grøne (Vinstrihreyfingin – grænt framboð) er det sosialistiske partiet på Island. Partiet, med forkortinga VG, blei skipa 6. februar 1999 som ein freistnad på å sameine venstresosialistar og miljøaktivistar framfor valet det året.

Venstrepartiet dei grøne
Land	Island
Partileiar(ar)	Katrín Jakobsdóttir
Grunnlagt	6. februar 1999
Medlemstal	5 000
Ideologi	demokratisk sosialisme, feminisme, grøn ideologi, grøn sosialisme, pasifisme, euroskeptisisme
Politisk posisjon	sentrum-venstre, venstresida

Da hadde det ei tid vore gjort freistnader på ei brei sameining av folk frå Alþýðubandalagið (Folkealliansen), Alþýðuflokkurinn (Sosialdemokratane), Kvennalistin (Kvinnelista) og Þjóðvaki (ei utbrytargruppe frå sosialdemokratane) i eitt samla parti, men det lukkast ikkje.

Endskapen på drøftingane om ulike alternativ for samling av venstrekreftene blei å skipe ei ny politisk rørsle, bygd på strid for sosial rettferd, sjølvstendig utanrikspolitikk og miljøvern. Partiet fekk 9,1 prosent av røystene og 6 medlemer av Alltinget. Ved valet i 2003 gjekk det litt tilbake, fekk 8,8 prosent av røystene og 5 medlemer av Alltinget. Ved valet i 2007 gjekk VG derimot mykje fram, fekk mesta 15 % av røystene og 9 medlemer innvalde i Alltinget. Valet i 2009 gav ny framgang, med 21,7 % av røystene og 14 alltingsmandat. Resultatet var likevel svakare enn dei fleste meiningsmålingane før valet, som gav partiet opp under 30 % oppslutnad. Venstrepartiet vart det tredje største partiet på det nye Alltinget.

Partiet er med i det nordiske venstrepartisamarbeidet Nordic Green Left Alliance, ilag med mellom andre norske SV.

Valresultat

Val	Røyster	%	Mandat
1999	15 115	9,1 %	6
2003	16 129	8,8 %	5
2007	26 136	14,3 %	9
2009	40 580	21,7 %	14

Bakgrunnsstoff

• Heimesida åt partiet (Mest stoff på islandsk, men noko på dansk og engelsk au.)