Viktor Kolotov

Viktor Mikhailovitsj Kolotov (3. juli 1949–3. januar 2000) var ein sovjetisk fotballspelar som hadde stor suksess med Dynamo Kiev i tida 1971-81. Midtbanespelaren deltok i 55 landskampar for Sovjetunionen i åra frå 1970 til -78.

Viktor Kolotov
Statsborgarskap	Sovjetunionen, Ukraina
Fødd	3. juli 1949 Yüdin
Død	3. januar 2000 (50 år) Kyiv
Idrett	fotball
Tok del i	Sommar-OL 1976, Sommar-OL 1972, EM i fotball 1972
Utmerkingar	3. klasse av Ukrainas fortjenstorden, Idrettens mester i Sovjetunionen

Klubbspel

Kolotov var fødd på landsbygda ved Kazan i den dåverande sovjetrepublikken Tatarstan. Etter å ha utmerkt seg på Rubin Kazan åra 1969 og -70, flytta han over til Dynamo Kiev frå 1971. Dynamo var i ferd med å byggje opp eit topplag, med eit mannskap som skulle dominere sovjetisk fotball det neste tiåret. Allereie i sit fyrste år med Dynamo vart Kolotov seriemeister og i 1974 vart det nasjonal dobbelttriumf. Toppen kom i 1975 med siger både i cupvinnarcupen, serien og den nasjonale cupen. I 1975 var Kolotov kaptein på laget og fekk gleda av å heve cupvinnarcup-pokalen etter å ha slått ungarske Ferencváros med 3-0 i finalen i Basel. Sidan vann han ytterlegare tre nasjonale meistertitlar i Sovjetunionen. Gjennom sine 10 sesongar i Dynamo Kiev var Kolotov med om å vinne fem seriemeisterskap og to nasjonale cup-pokalar. I 1981 vart han sitjande på reservebenken og la opp.

Landslagsspel

Kolotov fekk sin landslagsdebut hausten 1970 og skåra i alle dei fire fyrste landskampane han spelte. Han var med då Sovjetunionen tapte EM-finalen 1972 mot Vest-Tyskland med 0-3. Under dei olympiske sommarleikane 1972 spelte han alle seks kampane til Sovjetunionen og skåra i tre av dei. I turneringa delte Sovjet og Aust-Tyskland bronsemedaljane då bronsefinalen enda 2-2. Åra 1975 og 1976 var Kolotov kaptein på landslaget. I den eigenskap var han med å vinne bronsefinalen i Montreal-OL med 2-0 over Brasil. Etter å ha vore ute av landslaget ei tid, deltok han i fleire kampar i 1977/78-sesongen. Bortekampen mot Romania i mai 1978 vart hans 55. og siste i landslagsdrakta. Han skåra 22 landslagsmål.

Merittar

• Vinnar av cupvinnarcupen: 1975 med Dynamo Kiev
• Sovjetisk seriemeister: 1971, 1974, 1975, 1977, 1980 med Dynamo Kiev
• Sovjetisk cupmeister: 1974 og 1978 med Dynamo Kiev
• EM-sølv: 1972 med Sovjetunionen
• OL-bronse: 1972 og 1976 med Sovjetunionen

Kjelder

• Denne artikkelen bygger på «Viktor Kolotov» frå Wikipedia på engelsk, den 21. september 2018.

• eu-football]