Sekken
Sekken er ei øy i Molde kommune i Møre og Romsdal. Ho er 18,45 km² stor, har om lag 150 innbyggjarar (2024), og ligg ca 40 minutts ferjetur frå Molde by.
| Sekken | |
|---|---|
 Sekken med Veøy i forgrunnen, Hangholmen i midten | |
| Geografi | |
| |
| Stad | Romsdalsfjorden |
| Koordinatar | 62°39′18″N 7°19′40″E / 62.65500°N 7.32778°E
|
| Areal | 18,45 km²
|
| Høgaste punkt | Tranhaugen (304 moh.)
|
| Administrasjon | |
| Land | Noreg |
| Fylke Kommune |
Møre og Romsdal Molde
|
| Demografi | |
| Folketal | 157 (2024) |
| Folketettleik | 8,5 /km² |
Det høgste punktet på øya er Tranhaugen på 304 meter. Det går ein 20 kilometer lang grusveg rundt øya, som har barne- og ungdomsskule og barnehage, samt daglegvarebutikken Samsen, bygd på dugnad. Andreas Lunnans programserie Rundt neste sving på NRK hadde ein dokumentar frå Sekken i 2003.
Namnet «Sekken» har ikkje noko med ein sekk å gjere, men kjem frå norrønt /sæ-kinn/, som tyder noko slikt som ‘det bratte landet som stig opp frå sjøen’. Denne eigentlege tydinga visest òg i måten den opphavlege lokalbefolkninga uttalar namnet på øya, /sekkjinn/. Sekken er nemleg den brattaste og høgste øya i Romsdalsfjorden, mens dei andre, som Veøya og Bolsøya, er relativt flate.
Historie
endreHåkon Herdebrei skal ha vorte drepen av Erling Skakke i eit sjøslag utanfor Sekken i 1162, og det blir kvart år skipa til ein turmarsj på øya for å minnast dette, attåt ein bautastein som står attmed kyrkja på øya.
Nedlegging og oppbygging
endreI 1997 vart den førre butikken på Sekken lagd ned. Tre år seinare, i februar 2000, vart det skipa eit aksjeselskap som skulle starte ny daglegvarebutikk. Det vart selt aksjar for over 400 000 kronar, og ein butikk vart reist på dugnad.
Skulen og barnehagen har fleire gonger vore trua av nedlegging som følgje av nedskjeringar i det kommunale budsjettet, men dette har kvar gong møtt motstand og demonstrasjonar frå folket på øya, og har framleis ikkje fått gjennomslag.
Folketalsutvikling
endre| 1801[1] | 1900[2] | 2000[3] | 2024[3] |
|---|---|---|---|
| 135 | 295 | 156 | 157 |
Kjelder
endre- ↑ Folketeljing 1801 for Veøy prestegjeld, frå Digitalarkivet
- ↑ Folketeljing 1900 for Veøy herred, frå Digitalarkivet
- ↑ 3,0 3,1 Befolkning, etter grunnkrets, statistikkvariabel og år, frå Statistisk sentralbyrå