Bias Bernhoft

Tobias Brodtkorb Bernhoft, kjend som Bias Bernhoft (13. oktober 1902–24. november 1986) var ein norsk songar og revyforfattar.

Bias Bernhoft
Fødd	13. oktober 1902
Fødestad	Mjølfjellet
Død	24. november 1986 (84 år)
Dødsstad	Oslo
Opphav	Noreg
Sjanger	populærmusikk
Instrument	vokal
Verka som	songar, låtskrivar, manusforfattar
Born	Unni Bernhoft
Prisar	Leif Justers ærespris, Leonardstatuetten

Karriere

Bernhoft var fødd på Mjølfjell. Han debuterte som revysongar i 1926, og avslutta karrieren med å skriva tekstar til Jens Book-Jenssen i 1974. Gjennom hundreåret var han ein av dei viktigaste bakmennene i norsk revy, og skreiv for og/eller samarbeida med Arild Feldborg, svigersonen Bjørn Sand, Leif Juster, Einar Rose, Lalla Carlsen, Elisabeth Granneman, Kari Diesen, Wenche Myhre, Dizzie Tunes og Dag Frøland. Mellom Bernhoft sine kjende revyviser kan nemnast «Karl Johan og jeg» og «Omatt og omatt». Bias Bernhoft døydde i Oslo.

TV-portrettet Teksten var av Bias Bernhoft vart sendt i NRK i 1965. I det private dreiv han frå 1928 ein tobakksforretning på Majorstuen i Oslo. Denne vert i dag (2008) driven av dotter hans, Unni Bernhoft Sand, som også har ei fortid på «dei skrå breiddene». Bias Bernhoft vart tildelt Leonardstatuetten i 1973.

Kjelder

• Denne artikkelen bygger på «Bias Bernhoft» frå Wikipedia på bokmål, den 3. februar 2008.