Doris De Agostini

Doris de Agostini (28. april 1958–22. november 2020) var ein sveitsisk skirennar frå Airolo i kantonen Ticino. Ho vann bronsemedaljen i utfor under verdsmeisterskapen i alpint 1978, og utforcupen i verdscupen i 1983. Frå 1976 til -83 vann ho åtte utfortevlingar i verdscupen.

Doris De Agostini
Statsborgarskap	Sveits
Fødd	28. april 1958 Airolo
Død	22. november 2020 (62 år)
Idrett	alpint
Tok del i	Vinter-OL 1976, Vinter-OL 1980
Utmerkingar	Årets idrettsutøvar i Sveits

Aktiv

Utforspesialisten Agostini overraska stort då ho vann sin første siger i verdscupen i alpine greiner i 1976 i Bad Gastein. I sesongen elles kom ho aldri inn mellom dei ti beste, ho kom såleis på 18. plass i OL-utforen i Innsbruck. Også i 1977-sesongen gjorde ho einast eitt godt renn. I avslutningsrennet i verdscupen i US-amerikanske Heavenly Valley kom ho på tredjeplassen, bakom austerrikske Birgitte Totschnig og vest-tyske Evi Mittermaier.

Vinteren 1978 tok Agostini plass mellom dei 6-7 beste kvinnelege utforkøyrarane i verda. Som best fekk ho ein tredjeplass i verdscupen i eit renn i Pfronten, og toppa sesongen med bronsemedaljen i utfor under VM i alpint 1978 i Garmisch-Partenkirchen. Berre Annemarie Moser-Pröll frå Austerrike og Irene Epple frå Vest-Tyskland kom i mål på betre tid.

I 1979-sesongen kom Agostini på andreplassen i opningsrennet i utfor i verdscupen, atter var Moser-Pröll betre. Deretter forsvann Agostini frå toppen av resultatlistene. OL-sesongen 1980 hevda ho seg i enkelte verdscuptevlingar, med ein ny tredjeplass i Pfronten som best. I utforrennet i Vinter-OL 1980 i Lake Placid kom ho i mål på delt 17. plass.

Først fem år etter sin første og einaste siger i verdscupen, kunne Agostini stige til topps på sigerspallen. I januar 1981 i Schruns vann ho eit utforrenn framom Cindy Nelson frå USA. Seinare i sesongen vann ho eit nytt utforrenn. Også i 1982 vann ho to verdscuprenn. Ho kom inn på sjuandeplassen i VM i alpint 1982 i Schladming. I begge sesongane 1981 og 1982 kom ho på andreplass i samandraget i utforcupen, etter høvesvis landsmannen Marie-Theres Nadig og franske Marie-Cécile Gros-Gaudenier.

Sesongen 1982/83 vann Agostini utforcupen samanlagt, og kom på tiandeplass i verdscupen. Ho vann tre renn gjennom sesongen. Totalt vann ho i si tid åtte enkeltrenn i verdscupen, nitten gongar stod ho på sigerspalllen.

Ved sesongslutt i 1983 la ho opp.

Verdscupsigrar

Dato	Stad	Land	Øving
21. januar 1976	Bad Gastein	Austerrike	Utfor
12. januar 1981	Schruns	Austerrike	Utfor
28. januar 1981	Megève	Frankrike	Utfor
19. desember 1981	Saalbach-Hinterglemm	Austerrike	Utfor
14. februar 1982	Arosa	Sveits	Utfor
7. desember 1982	Val-d’Isère	Frankrike	Utfor
14. januar 1983	Schruns	Austerrike	Utfor
29. januar 1983	Les Diablerets	Sveits	Utfor

Kjelder

• Denne artikkelen bygger på «Doris De Agostini» frå Wikipedia på tysk, den 19. januar 2012.

Bakgrunnsstoff

• (en) Doris De Agostini – Profil og resultatoversikt hos FIS