Dvergkivi

Dvergkivi, Apteryx owenii, ein den minste kiviarten, opphavleg truleg frå Sørøya på New Zealand, men i dag er det meste av populasjonen funne på Kapiti Island ved sørkysten av Nordøya.

Dvergkivi
Dvergkivi Illustrasjon av John Gerrard Keulemans, public domain
Utbreiing og status
Status i verda: Nær truga Utbreiinga av dvergkivi
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Apterygiformes
Familie:	Apterygidae
Slekt:	Kiviar Apteryx
Art:	Dvergkivi A. owenii
Vitskapleg namn
Apteryx owenii Gould, 1847

Dvergkivi har ei lengd på 35-45 cm, hannen veg 0,9-1,3 kg, hoa ca. 200 gram meir. Fjørdrakta er brungrå, med lyse horisontale striper, nebb og føter er lyse.

Det er sette ut små bestandar på ei rekkje øyar i området ved Cooksundet og Haurakibukta. I 2000 blei ca. 20 dvergkiviar sette ut i Karori-reservatet, Wellington. Dei lever i alle typar habitat på Kapiti, inkludert gjenreist skog, grasmark og kratt.

Dvergkivi pleier å ete ulike virvellause dyr, andre små insekt og jamvel nokre typar frukt. Når dei beitar, rører dei seg langsamt framover, søkjer og snuser med nebbet og dei kan nokre gongar grave litt i bakken.

Dei hekkar i ei utgraven hòle, i ein hol trestamme eller i tett vegetasjon. Mest vanleg legg hoa eitt egg i kullet, nokre gonger to, og hannen rugar i ein periode på 63-76 dagar. Egget veg ca. 300 gram. Etter klekking held ungen seg i reiret i fire til fem dagar før han vandrar ut etter føde.

Populasjonen er estimert til totalt over 1200 individ (2012) og er stabil. Forventa levealder er 45 år.

Kjelder

• Denne artikkelen byggjer på «Little Spotted Kiwi» frå Wikipedia på engelsk, den 7. juli 2012
• Barrie Heather og Hugh Robertson, The Field Guide to the Birds of New Zealand (revised edition), Viking, 2005
• BirdLife International (2014) Species factsheet: Apteryx owenii. Henta frå http://www.birdlife.org den 11. januar 2015

Bakgrunnsstoff

• Videoar, bilete og lydopptak av dvergkiviar hos Internet Bird Collection