Erling Rønneberg

Erling Rønneberg (fødd 9. september 1923 i Ålesund, daud 8. juli 2008 i Ski) var ein norsk motstandsmann og Secret Intelligence Service under andre verdskrigen.

Erling Rønneberg
Statsborgarskap	Noreg
Fødd	9. september 1923 Ålesund kommune
Død	8. juli 2008 (84 år) Ski kommune
Yrke	politikar
Politisk parti	Arbeidarpartiet

Av utdanning var han lektor. Han var lokalpolitikar for Arbeidarpartiet og vart rådmann i Ski kommune. Han var ordførar i Ski kommune frå 1958 til 1963.

Bakgrunn

Farfar var Joachim Holmboe Rønneberg. Broren Joachim Rønneberg var medlem i kompani Linge.

Under andre verdskrigen

I Ålesund var han, i første del av krigen, med på å gi ut illegale aviser. Hausten 1943 var han i Oslo for å starte eit illegalt studentblad, Vi studerer. Der i frå måtte han røme. Han kom seg til Sverige via Ålesund og Korgen i Nordland. Frå Sverige vart han henta til Storbritannia. Der fekk han opplæring som radiotelegrafist i Secret Intelligence Service. Frå september 1944 til februar 1945 opererte han SIS radiostasjonen Haga, på Torholmen nord for Ålesund. Erling Rønneberg fekk i oppdrag, saman med Karsten Devold, å etablerere ein ny sendar, ved Rjåneset i Ørsta Der hadde dei oversikt over skipsleia i Vartdalsfjorden, og andre fjordar på Søre Sunnmøre. 14. april 1945 var radiostasjonen Turid i drift. Men alt 20. april vart stasjonen teken. Rønneberg fekk store skotskadar. Han vart halden fanga på sjukehuset i Ålesund til krigen var slutt.

Etter krigen

I 1949 tok Rønneberg eksamen i økonomi frå Cambridge. Han kom til Ski kommune i 1950 som lektor på Sørmarka folkehøgskule, der han seinere òg vart rektor.

Frå 1964 vart han den første rådmannen i Ski kommune. Denne stillinga hadde han i 27 år og la i denne perioden fram i alt 21 179 sakar til politisk handsaming i formannskap og kommunestyre. Dette var ein ekspansiv periode for Ski kommune, og innbyggjartalet vart fordobla.

Han var ordførar i Ski kommune frå 1958 til 1963.

Som pensjonist brukte Rønneberg mykje tid på lokalhistorisk arbeid, og han formidla opplevingar frå andre verdskrigen, der han deltok aktivt i motstandskampen, til ungdom i kommunen. For dette arbeidet fekk han kulturprisen til Ski kommune i 1999.

Utmerkingar

For innsatsen sin under andre verdskrigeb vart Rønneberg tildelt St. Olavsmedaljen med eikegrein og den britiske King's Medal for Courage in the Cause of Freedom.

Erling Rønneberg fekk Ski kommune sin kulturpris i 1999.

Kjelder

• Georg Stub: Nekrolog i Aftenposten kultur 17. juli 2008 side 13

---

• Denne artikkelen bygger på «Erling Rønneberg» frå Wikipedia på bokmål, den 28. november 2017.

Litteratur

• Vi valgte det vi ikke kjente: norske krigsdeltakere om dengang og nå. Forum. 1995. s. 158. ISBN 8203290590.