Frederic Leighton

Frederic Leighton (3. desember 1830–25. januar 1896) var ein britisk målar og bilethoggar som arbeidde med historiske, bibelske og klassiske tema. Leighton var ein av dei fremste målarane i heimlandet i viktoriatida; i siste halvdel av 1800-talet var han den mest moterette biletkunstnaren i England. Suksessen hans bygde på at han makta å fange inn den viktorianske nostalgien og lengselen etter «gullalderen» i antikke Hellas og Roma.

Frederic Leighton
Sjølvportrett, 1880
Statsborgarskap	Det sameinte kongeriket Storbritannia og Irland
Fødd	3. desember 1830 Scarborough
Død	25. januar 1896 (65 år) London
Yrke	kunstmålar, bilethoggar, politikar, teiknar, kunstnar
Sjanger	historiemåleri, målarkunst, allegori, mytologisk maleri, figurmåleri, portrettmåleri
Medlem av	Royal Academy of Arts, Académie des beaux-arts
Far	Frederick Septimus Leighton
Mor	Augusta Susan Nash
Frederic Leighton på Commons

Liv og gjerning

Leighton var fødd i Scarborough og var av legeslekt. Han var elev ved University College School i London og fekk deretter kunstundervising på det europeiske kontinentet, fyrst av austerrikaren Edward von Steinle og sidan av italienaren Giovanni Costa. Ei tid studerte han ved Accademia di Belle Arti i Firenze. Frå 1855 til 1859 budde han i Paris, der han møtte Jean Auguste Dominique Ingres, Eugène Delacroix, Camille Corot og Jean-François Millet.

Psykes bad, 1879

I 1860 flytta Leighton til London, der han utfordra prerafaelittane. Leighton var delvis i opposisjon til den prerafaelittiske kunstretninga, og vart ein føregangsmann for den sentimentale klassisismen og idealismen som rådde grunnen gjennom den seinviktorianske epoken. I klassisk inspirerte verk som Clytie, Idyll og Greske jenter plukkar perler ved havet, avbilda Leighton ein idealisert versjon av fortida som samsvara med stemningane i dei britiske overklassemiljøa. Ved å kombinere ein feilfri måleteknikk med ein skarp sans for farge og komposisjon, skapte Leighton nokre av dei mest minneverdige britiske 1800-talsmåleria.

Skulpturen Atlet bryt med ein kvelarslange, som Leighton laga i 1877, vart i si tid sett på som å ha innleia ein renessanse for samtidig britisk skulptur, ofte referert til som «den nye skulptur». Leighton var medlem av Royal Academy of Arts frå 1869. Ni år seinare tok han over som president i foreininga, ein posisjon han hadde til han døydde i 1896. Måleri av Leighton representerte Storbritannia ved verdsutstillinga i Paris i 1900.

Kjelder

• Denne artikkelen bygger på «Frederic Leighton» frå Wikipedia på engelsk, den 5. mai 2013.

Bakgrunnsstoff

Commons har multimedium som gjeld: Frederic Leighton