Gianluca Vialli

Gianluca Vialli
	Vialli i 2018.
Personleg informasjon
Fødselsdato	9. juli 1964
Fødestad	Cremona i Italia
Dødsdato	6. januar 2023 (58 år)
Høgd	180 cm
Posisjon	Angrepsspelar
Seniorkarriere*
Landslag
Trenar for
1998-2000	Chelsea
2001-2002	Watford
	* Seniorklubbkampar og mål berre telt for nasjonal liga

Gianluca Vialli (9. juli 1964–6. januar 2023)^[1] var ein italiensk fotballspelar frå Cremona. Han spelte for US Cremonese, Sampdoria, Juventus og Chelsea. Vialli var kjend som ein allsidig og drivande angrepsspelar, teknisk dyktig, med gode skotbein og luftstyrke.

Karriere

Klubbspel

Vialli spelte for Cremonese i heimlege Serie B frå 1980 til 1984 og fekk med seg 105 kampar og skåra 23 mål. Sommaren 1984 vart han overført frå Serie B-klubben til Sampdoria i Serie A. Allereie i sin fyrste sesong for klubben frå Genova kunne han innkassere sin fyrste meistermedalje då Sampdoria vann den nasjonale cupfinalen. Også i 1988 og 1989 vann Sampdoria cuppokalen i Italia.

Vialli skåra begge måla då Sampdoria vann finalen i Cupvinnarcupen 1989/90 med 2-0, ein kamp som var mållaus til det 105. minutt. Året etter opplevde han eit høgdepunkt i si karriere då Sampdoria vann sitt fyrste og hittil einaste seriemeisterskap. Sampdoria hadde eit jamnt godt lag, med Vialli som den sentrale spelaren saman med spissmakkeren Roberto Mancini. Han vart då òg toppskårar i Serie A den sesongen med 19 mål, og i Cupvinnarcupen med sju nettkjenningar.

I 1992 vart Vialli overført frå Sampdoria til Juventus for 150 millionar kroner, rekordhøgt i verda. Han hadde då spelt 223 kampar og skåra 85 mål for Sampdoria. Allereie i sin fyrste sesong i Torino-klubben var han med å vinne UEFA-cupen. Juventus vart så italiensk dobbeltmeister i 1995 med Vialli som toppskårar. Våren etter vann Juventus Meisterligaen. Finalen i turneringa vart hans siste kamp for Juventus, etter 102 kampar og 38 mål for klubben.

Vialli spelte tre sesongar i Chelsea, 1996-99, og var med å vinne både Cupvinnarcupen, FA-cupen og Ligacupen. Han spelte 58 kampar for London-klubben og skåra 21 mål. Frå februar 1998 var han spelande trenar i Chelsea, ein jobb han hadde til hausten 2000. Sesongen 2001/02 var han ei tid trenar for Watford FC.

Landslagsspel

Vialli spelte 59 kampar på landslaget og skåra 16 mål. Han debuterte i bortekamp mot Polen i november 1985, og var med i Italias troppar til VM i fotball 1986, EM 1988 og VM 1990. Både i 1986 og 1988 var han med i fyrsteellevaren, medan han fekk heller lite speletid under VM på italiensk heimebane i 1990. Han deltok i tre landskampar der Noreg var motstandar; fyrst den mållause vennskapskampen i Oslo i mai 1987, og så i dei to kvalifiseringskampane til EM i fotball 1992, der Noreg 5. juni 1991 vann den legendariske heimekampen 2-1 og så heldt Italia til 1-1 i Genova fem månader seinare. I sin siste landskamp, 19. desember 1992, skåra Vialli det eine målet då Italia vann 2-1 over vertslandet Malta. Ein konflikt med landslagssjefen Arrigo Sacchi førte til at han sidan ikkje vart teken ut i landstroppar.

Merittar

VM-bronse 1990 for Italia
Vinnar av Meisterligaen 1996 med Juventus
Vinnar av Cupvinnarcupen 1990 med Sampdoria
Vinnar av Cupvinnarcupen 1998 med Chelsea
Vinnar av UEFA-cupen 1993 med Juventus
Italiensk seriemeister 1991 med Sampdoria
Italiensk seriemeister 1995 med Juventus
Italiensk cupmeister 1985, 1988 og 1989 med Sampdoria
Italiensk cupmeister 1995 med Juventus
Engelsk cupmeister 1997 med Chelsea

Kjelder

↑ «Italian great Vialli passes away». FIFA. 6. januar 2023. Henta 6. januar 2023.

Denne artikkelen bygger på «Gianluca Vialli» frå Wikipedia på tysk, den 13. april 2015.

Denne artikkelen bygger på «Gianluca Vialli» frå Wikipedia på engelsk, den 13. april 2015.

Bakgrunnsstoff

Gianluca Vialli på FIFA sin offisielle nettstad
eu-football

[1] «Italian great Vialli passes away». FIFA. 6. januar 2023. Henta 6. januar 2023.

[1]