Harald Norpoth

Harald Norpoth (fødd 22. august 1942) er ein tysk tidlegare mellom- og langdistanseløpar frå Münster som representerte Vest-Tyskland. Han var ein spurtsterk utøvar som vann sølvmedaljen på 5 000 meter både under Sommar-OL 1964 og Friidretts-EM 1966, og bronsemedaljen på 1500 meter i nemnde europameisterskap, så vel som på 5 000 m ved Friidretts-EM 1971.

Harald Norpoth
Statsborgarskap	Tyskland
Fødd	22. august 1942 (82 år) Münster
Idrett	800 meter, friidrett
Tok del i	Sommar-OL 1964
Utmerkingar	Silbernes Lorbeerblatt, Verdienstorden des Landes Nordrhein-Westfalen

Aktiv

Norpoth stega inn i verdseliten på 1500 m i 1962-sesongen. Fire dagar etter han fall i 1500-meterfinalen under EM i friidrett, vann han distansen i eit løp i Warszawa og sette vesttysk rekord med tida 3.41,2. Frå 1963 byrja han også å tevle på 5 000 m. Sommaren 1964 sette han vesttysk rekord med eit løp på 13.48,4. Nokre veker seinare kneip han sølvmedaljen på 5 000 meter ved Sommar-OL 1964 i Tokyo, 0,2 sekund framom Bill Dellinger frå USA og franske Michel Jazy.

I juli 1965 flytta Nordpoth den vesttyske 5 000-meterrekorden til 13.42,8. Nøyaktig 11 månader seinare sette han europarekord på distansen då han fekk notert 13.24,8 i Köln. Under europameisterskapen 1966 i Budapest fekk han bronsemedaljen på 1500 m, slått i spurten av landsmannen Bodo Tümmler og Jazy. Tre dagar seinare sprang Norpoth inn til sølv på 5 000 m, også då vart Michel Jazy for sterk på oppløpssida. Ei veke etter EM presterte Norpoth verdsbestenotering på 2 000 meter då han i Hagen vart klokka i mål på 4.57,8. Sju dagar seinare presterte han 3.39,7 og livsbeste på 1500 m.

Under Sommar-OL 1968 enda Norpoth på fjerdeplass på 1500 m, langt bakom medaljevinnarane. Han deltok ikkje i Athen-EM 1969. I Friidretts-EM-1971 tok han derimot bronsen på 5 000 m, 1,3 sekund bak vinnaren Juha Väätäinen, og to tidels sekund attom franskmannen Jean Wadoux. Ved dei olympiske sommarleikane i München enda Norpoth på sjetteplass, over 6 sekund etter Lasse Virén, den olympiske meisteren. Den 12. juli 1973, under ein landskamp mot Sveits og USA i München, forbetra Norpoth den tyske 5 000-meterrekorden til 13.20,5. Han la opp same året.

Medaljar og plasseringar i internasjonale meisterskap

• EM 1962 i Beograd: Nr 9 på 1500 m (braut løpet etter fall)
• OL 1964 i Tokyo: Sølvmedalje på 5 000 m – 13.49,6, bakom Bob Schul (13.48,8)
• EM 1966 i Budapest: Sølv på 5 000 m – 13.44,0. Bronse på 1500 m – 3.42,4
• OL 1968 i Mexico-byen: Nr 4 på 1500 m 3.42,5. Nr 13 på 5 000 m (braut løpet)
• EM 1971 i Helsinki: Bronsemedalje på 5 000 m – 13.33,7
• OL 1972 i München: Nr 6 på 5 000 m – 13.32,6

Kjelder

• Denne artikkelen bygger på «Harald Norpoth» frå Wikipedia på tysk, den 16. mai 2021.