Helge Reiss

Helge Reiss (fødd 27. februar 1928 i Oslo, død 11. november 2009) var ein norsk skodespelar. Etter å ha teke examen artium i 1946, byrja han på Nationaltheatrets elevskole, og frå 1949 var han fast tilsett ved Det Nye Teater (frå 1959 Oslo Nye Teater), der han var ein ankermann i ensemblet gjennom femti år, fram til han vart pensjonist i 1998. Der viste han talent innanfor humoristiske, så vel som poetiske roller.

Helge Reiss
Fødd	27. februar 1928
Fødestad	Oslo
Død	11. november 2009 (81 år)
Dødsstad	Oslo
Aktive år	1949–2009
Verka som	skodespelar, filmskodespelar, fjernsynsskodespelar, stemmeskodespelar, manusforfattar
Far	Thorleif Reiss
Born	Georg Michael Reiss, Esther Reiss

Helge Reiss arbeidde også mykje med radio. Då han var gutunge var han med i programma til faren, og seinare var han opplesar og skodespelar i Radioteatret. Han vart også mykje brukt som opplesar i barneprogram på fjernsyn og som stemme for ulike teiknefilmfigurar. Dei mest kjende fjernsynsrollene hans var elles «Professor Drøvel» i Brødrene Dal og professor Drøvels hemmelighet og den tuslete ektemannen i komiserien Nr. 13.

Reiss hadde også ei rekkje filmroller, mellom anna som politibetjenten i Skulle det dukke opp flere lik, er det bare å ringe … (1970), baronen i Olsenbanden for full musikk (1976) og obersten i Mors Elling (2003). Mellom dei meir seriøse filmrollene hans må seiast å vere professor Hieronimus i Formynderne (1978), som var basert på to bøker av Amalie Skram.

Han var yrkesaktiv heilt fram til våren 2009, då han var den norske stemma til hovudpersonen «Carl Fredricksen» i Disney/Pixar-filmen Up. Mellom dei siste skodespelarrollene til Reiss var bohemen «Gregorius Bang» i Hotel Cæsar frå april til august 2009. Han sovna stilt inn onsdag 11. november 2009.

Helge Reiss var son av skodespelaren Thorleif Reiss og far til Georg Michael Reiss og Esther Reiss.

Filmografi

År	Tittel	Rolle
1948	Den hemmelighetsfulle leiligheten	Kelner (ukreditert)
1959	5 loddrett	Seljar
1961	Hans Nielsen Hauge	Overrettsprokurator Lumholtz
1970	Skulle det dukke opp flere lik, er det bare å ringe …	Politibetjent Jeremias Pedersen Grodahl
1971	Gråt, elskede mann
1974	Den siste Fleksnes	Flypassasjer
1975	Flåklypa Grand Prix	Rudolf Blodstrupmoen (stemme)
1976	Bør Børson II	O.G. Hansen
	Olsenbanden for full musikk	Baronen
1977	Olsenbanden & Dynamitt-Harry på sporet	Mann i grått
1978	Formynderne	Professor Hieronimus
1980	La elva leve!	Industrirepresentant
1982	For Tors skyld	Far til Laila
1985	Deilig er fjorden!	Svoger
1987	På stigende kurs	Disponent
1992	Det perfekte mord
1998	Solan, Ludvig og Gurin med reverompa	Rudolf Blodstrupmoen (stemme)
2000	De 7 dødssyndene
	Hovmod
2003	Mors Elling	Bugge-Høvik
2004	Gråtass – Hemmeligheten på gården	Advokat Antonsen

Fjernsynsroller

Denne lista er truleg ikkje komplett.

År	Tittel	Rolle
1972	Fleksnes fataliteter – Vinterferie	Mann på flyet
1974	Fleksnes fataliteter – Biovita Helsesenter	Vaktmann på helsesenteret
1979	Brødrene Dal og professor Drøvels hemmelighet	Professor Drøvel
1998	Nr. 13	Herr Skau
2005	Tjuefjerde	Faren Per
2009	Hotel Cæsar	Gregorius Bang

Kjelder

• «Reiss, Helge» av Svein Erik Brodal i Norsk biografisk leksikon; bind 7, Njøs–Samuelsen (Oslo: Kunnskapsforlaget, 2003) (www).
• Reiss Helge Reiss ved The Internet Movie Database (IMDb).