Henrik Kaarstad
Henrik Kaarstad (12. august 1865–13. desember 1927)[1] var ein norsk skulemann som stod bak oppstarten av Volda lærarskule. Han vart fødd i Innvik i Sogn og Fjordane, men voks opp på garden Kårstad i Utvik dit foreldra flytte då han var barn.
| Henrik Kaarstad | |||
| Fødd | 12. august 1865 | ||
|---|---|---|---|
| Død | 13. desember 1927 (62 år) | ||
| Yrke | skribent | ||
| Alle verv |
| ||
Utanom barneskulen gjekk Kaarstad amtsskulen i Gloppen, to-årig lærarskule på Stord og Hambros mellomskule i Bergen. Han hadde tenkt å studere teologi, men då han i 1886 vart tilsett som styrar ved «Voldens høiere Almueskole», vart det ikkje noko. Sjølv om han ikkje vart teolog, var han heile livet oppteken av og engasjert i kristeleg og sosialt arbeid. Kaarstad var styrar av allmugeskulen til 1892. Då vart skulen nedlagd som følgje av den nye folkeskulelova av 1889. I 1892 vart Kaarstad, som no var gift med Johanne Flote frå Folkestad i Volda, tilsett som lærar og klokkar i Talvik i Finnmark.
I 1893 drog paret attende til Volda og starta privat eit eitt-årig kurs for den lågare lærarprøva. Saman med Aage Stabell starta han i 1895 to-årig privat lærarskule i Volda. Kaarstad løyste i 1908 ut Stabell og vart eineeigar og styrar av skulen. Same året fekk skulen eksamensrett. Då han i åra etter fyrste verdskrigen såg at lærarskulen snart ville verte fireårig, gjekk han i gang med å få reist eit nytt lærarskulebygg. Han fekk kjøpt ei tomt som han kalla «Kåretun». Her stod nybygget ferdig i 1922. Huset vart teikna av arkitekten Øyvin Berg Grimnes.[2] Huset høyrer i dag til Høgskulen i Volda og vert kalla Henrik Kaarstad-huset.
I tillegg til arbeidet i skulen var Henrik Kaarstad samfunnsengasjert. Han var medlem av skulestyret og heradstyret. Ein periode var han ordførar i Volda.
Kaarstad skreiv fleire lærebøker til bruk i lærarskulen. Han var rektor på Volda lærarskule til han døydde i 1927.
Kjelder
endre- Ola Gjengedal: «Henrik Kaarstad» i Årbok for Nordfjord 1988.
- Peder Bergem (red): Forkynning, fellesskap, forsking : Volda lærarskule 1895-1995, Høgskulen i Volda, ISBN 8299359007
Fotnotar
endre- ↑ «001 Henrik Kaarstad - 0029 Engeset - 004 Strand-Engeset - Tellingskretsoversikt - Folketelling 1910 for 1519 Volda herred». Digitalarkivet.
- ↑ «Bygga på Høgskuleområdet», www.hivolda.no, henta 18. mai 2021