Herman Lunde

Carl Herman Lunde (31. august 1841–14. mai 1932) var ein norsk teolog som verka som prest i over 50 år. Toneskaparen Johan Backer Lunde var son hans.

Herman Lunde
Statsborgarskap	Noreg
Fødd	31. august 1841
Død	14. mai 1932 (90 år)
Yrke	skribent, prest
Politisk parti	Venstre
Religion	Den evangelisk-lutherske kyrkja
Ektefelle	Inga Lunde

Herman Lunde vart fødd i Nes i Buskerud og voks opp fleire stader på Austlandet, sist i hovudstaden. Far hans var sorenskrivaren og seinare rådstueskrivare og auksjonsforvaltare Johan Peter Ernst Lunde (1791–1886). Mora var Ragnhild Fredrikke Louise Mathilde Püllich (1810–78).

I 1866 vart han cand.theol. og var dei neste to åra lærar i Horten. Frå 1868 arbeidde han som sjømannsprest, fyrst i Cardiff til 1873 og sidan i fire år i Le Havre. Perioden 1877-81 var han prest for den dansk-norske kyrkjelyden i Paris. I 1881 reiste han heim til Noreg og var sokneprest i Risør til 1892. Han busette seg då i hovudstaden, der han var residerande kapellan i Vår Frelsars kyrkje i 9 år og til sist sokneprest i Treeiningskyrkja i 17 år. Frå 1895 til 1925 var han ein «[p]opulær forlikskommissær».

Lunde var ein «frisk forkynnar, levande interessert i kunst, aktiv idrottsmann og pol. liberal». Dei nærast avteologiserte oppfatningane hans av kristendommen vart møtt med motstand frå presteskapet og kristenfolket flest. Derimot var han ein mykje søkt sjelesyrgjar for menneske i utkanten av kyrkjekulturen.

Lunde gav ut fleire preikesamlingar, der han formidla eit syn som prøvde å sameine religionen med ei nyare forståing av mennesket. Av desse kan nemnast eit motskrift frå 1906 mot Arne Garborgs verk Jesus Messias, Kristus-prædikener frå 1908 og ei bok frå 1910 om Martin Luther.

Kjelder

• Norsk biografisk leksikon