Hordamuseet
Hordamuseet er ei avdeling av Bymuseet i Bergen. Museet ligg på Stend i bydelen Fana i Bergen, der det er ein museumbygning og ei friluftsavdeling med tretti bygningar. Dessutan har museet ei samling på ni stølshus plassert ikring i terrenget på Fanafjellet, i nærleiken av det høgste punktet på vegen over fjellet.
Samlingane av tradisjonelle hus, båtar, reiskapar og tekstilar er meint å formidla noko av den særeigne levemåten til folket på bygdene i Hordaland i gamal tid. Rike arkeologiske kulturminne innanfor museumsområdet på Stend, mellom anna ei nausttuft frå jarnalderen, vitnar dessutan om busetjing her i 10 000 år. I utstillinga til Norsk vegmuseum på Hordamuseet er det maskiner og utstyr nytta til bygging og vedlikehald av vegane ikring i fylket.
Hordamuseet vart skipa i 1945 som Hordaland Landbruksmuseum på den tidlegare Stend Hovedgårds gamle grunn. Museet fekk namnet Hordamuseet i 1969, og vart frå nyttår 2007 ein part av Bymuseet i Bergen. Initiativtakar og den fyrste museumsstyraren var Johannes Revheim (1907–98).
Museumsbygningen, teikna av arkitekt Einar Vaardal-Lunde, stod ferdig i 1977, og vart utvida i 1998 med eit teaterlokale for Hordaland Teater, kalla Anne Gullestads sal, og ein kafé. Museet og teateret har sams inngang.