Kerron Clement

Kerron Stephon Clement (fødd 31. oktober 1985) er ein trinidadisk-amerikansk friidrettsutøvar frå Port of Spain i Trinidad og Tobago. Han vart verdsmeister i 400 meter hekk i 2007 og 2009 og olympisk meister i 2016, alle gongane som representant for USA.

Kerron Clement
Statsborgarskap	USA
Fødd	31. oktober 1985 (39 år) Port of Spain
Idrett	friidrett
Tok del i	Sommar-OL 2012, Sommar-OL 2008, Friidrett under Sommar-OL 2016, Panamerikanske leker 2015

Kerron Clement under Sommar-OL 2016 i Rio de Janeiro

Aktiv

Clement vart USA-amerikansk statsborgar i 2004. Same året vann han 400 m hekk ved junior-VM i friidrett. Den 26. juni 2005 sette han personleg rekord i øvinga med tida 47,24 sekundar, oppnådd i Carson i California. Han levde ikkje opp til favorittstempelet under verdsmeisterskapen 2005 i Helsinki og enda på fjerdeplass i finalen.

Sommaren 2007 forbetra Clement den personlege rekorden på 400 meter til 44,48 sekundar under eit stemne i Stockholm den 7. august. Han beheldt forma og vann ein klar siger i spesialøvinga 400 meter hekk då friidretts-VM fann stad i Osaka tre veker seinare. Året etter fekk Clement OL-sølv på langhekken under Sommar-OL i Beijing, der lagkamerat Angelo Taylor var heilt suveren i finalen.

Clement forsvarte verdsmeistertittelen på 400 meter hekk då VM i friidrett 2009 fann stad i Berlin. Han vann elles gullmedalje nummer to i meisterskapen då han sprang den andre etappen for USA i 4 x 400 meter stafett, dei andre på laget var Angelo Taylor, Jeremy Wariner og LaShawn Merritt.

Etter nokre svakare sesongar kom Clement tilbake i verdseliten i 2015, men var eitt hundredels sekund for seint ute til å kapre bronsemedaljen på langhekken ved VM i friidrett i Beijing. Derimot lukkast han overmåte godt då han stilte til start i dei olympiske leikane 2016. I ein jamn hekkefinale braut Clement målsnora på tida 47,73 sekundar, fem hundredels sekund framom kenyanaren Boniface M. Tumuti.

Medaljar og plasseringar i internasjonale meisterskap

• VM 2005 i Helsinki: Nr 4 i 400 m hekk – 48,18
• VM 2007 i Osaka: Gullmedalje i 400 m hekk – 47,61, framom Félix Sánchez (48,01)
• OL 2008 i Beijing: Sølvmedalje i 400 m hekk – 47,98, bakom Angelo Taylor (47,25)
• VM 2009 i Berlin: Gullmedalje i 400 m hekk – 47,91, framom Javier Culson (48,09) + gull i 4 x 400 m stafett
• VM 2011 i Daegu: Utslått i semifinalane i 400 m hekk (52,11 =nr 24)
• VM 2015 i Beijing: Nr 4 i 400 m hekk – 48,18, bakom Jeffrey Gibson (48,17)
• OL 2016 i Rio de Janeiro: Gullmedalje i 400 m hekk – 47,73, framom Boniface M. Tumuti (47,78)
• VM 2017 i London: Bronsemedalje i 400 m hekk – 48,52

Kjelder

• Denne artikkelen bygger på «Kerron Clement» frå Wikipedia på engelsk, den 15. juli 2017.

• «Kerron Clement» (på engelsk). Olympedia. Henta 12. mars 2023.