Lene Antonsen

Lene Antonsen (fødd i 1962) er ein samisk språkforskar frå Tromsø i Noreg. Ho er tilsett som professor i samisk ved Institutt for språk og kultur ved UiT Noregs arktiske universitet.

Lene Antonsen
Fødd	1962
Yrke	lingvist, professor
Alma mater	Universitetet i Tromsø – Noregs arktiske universitet
Barn	Sandra Márjá West

Lene Antonsen frå Giellatekno og Børre Gaup frå Divvun på Riddu Riđđu 2019

Lene Antonsen er cand.philol. med ei hovudoppgåve om språkendring i bøyingsverket i Kåfjorddialekten av nordsamisk frå 2007, og ph.d. med ei avhandling (2018) om samisk språkteknologi, begge frå UiT, og med finsk, arkeologi og pedagogikk i fagkrinsen. Ho er og utdanna trykkar frå Brundalen videregående skole i Trondheim, og har arbeidd som samisklærar, først i Karasjok, og deretter, i 1994-2006 som språkkonsulent i Kåfjord kommune og etter kvart som leiar for Gáivuona sámi giellaguovddáš

Arbeid som forskar

Antonsen har arbeidd framfor alt med samisk språkteknologi, både med maskinomsetjing, e-læring, e-leksikografi og automatisk morfologisk og syntaktisk analyse. Doktoravhandlinga frå 2018 gjev ei innføring til arbeidet hennar på dette området. Ho har også arbeidd med emne frå samisk grammatikk, både med adposisjonar (jf. Antonsen, Janda og Bals Baal 2012, Janda, Antonsen og Bals Baal 2014) og med possessivsuffiks. Både hovudoppgåva og senare arbeid (Antonsen 2008) har tatt opp diakrone aspekt ved nordsamisk morfologi.

Sjølv om dei fleste publikasjonane hennar handlar om nordsamisk, har ho også arbeidd med sør-, lule- og enaresamisk.

Arbeid som pedagog

Lene Antonsen var sentral i oppbygginga av det samiske språksenteret i Kåfjord, noko ho dokumenterer i Antonsen og Broch Johansen 2013. Ein grundigare og komparativ analyse av verksemda ved alle dei samiske språksentera er Antonsen 2015. Ho integrerte samiskundervisninga med allment arbeid for samisk kultur, og var også redaktør for Årbok for Nord-Troms i fleire år.

Arbeid med duodji

Lene Antonsen gjorde eit viktig arbeid for å dokumentere Lyngenkofta, jf. Antonsen 1997.

Anna

Lene Antonsen er mor til den samiske politikaren og kulturarbeidaren Sandra Márjá West.

Verk (utval)

• Antonsen, Lene 2021: 'Lei niogtredve go byggiimet.' Om unormerte lån fra norsk i samisk talespråk. I: Språk i arkiva. Ny forsking om eldre talemål frå LIA-prosjektet. Novus Forlag. ISBN 9788283900811. s. 179-200
• Janda, Laura A; Antonsen, Lene 2020: Davvisámi earutkeahtes oamasteapmi [Inalienability in North Saami]. Sámi dieđalaš áigečála.
• Antonsen, Lene 2018: Sámegielaid modelleren – huksen ja heiveheapmi duohta giellamáilbmái. Ph.d.-avhandling. Tromsø: UiT Norges arktiske universitet 244 s.

• Antonsen, Lene 2015: Språksentrenes voksenopplæring I: Jon Todal (red): Samiske tall forteller 8. Kommentert samisk statistikk 2015. Guovdageaidnu: Sámi allaskuvla.
• Janda, Laura Alexis; Antonsen, Lene; Baal, Berit Anne Bals 2014: A Radial Category Profiling Analysis of North Sámi Ambipositions. High Desert Linguistics Society Proceedings 10(2014)
• Antonsen, Lene 2013: Čállinmeattáhusaid guorran. (English summary: Tracking misspellings.) – Sámi dieđalaš áigečála 2/2013: 7–32.
• Antonsen, Lene og Siri Broch Johansen 2913: Kåfjord samiske språksenter – erfaringer og minner. I: Elfrid Boine, Siri Broch Johansen, Svein Lund, Siv Rasmussen (red): Samisk skolehistorie 6.
• Antonsen, Lene & Laura Janda & Biret Ánne Bals Baal 2012: Njealji davvisámi adposišuvnna geavahus. (English summary: The use of four North Saami adpositions.) – Sámi dieđalaš áigečála 2/2012: 7–38.
• Antonsen, Lene 2008: Lokatiivva gehčosat Gáivuona suopmanis. (English summary: Locative suffixes in the Gáivuotna dialect.) – Sámi dieđalaš áigečála 2/2008: 3–20.
• Antonsen, Lene 2007: Giella buolvvas bulvii : gáivuona sámegiela morfologiija guorahallan. Hovudoppgåve, UiT.
• Antonsen, Lene (1997). Duodjegirji Ivgogáktái =: Arbeidsbok for Lyngenkofta. [Olmmáivággi/Manndalen]: Gáivuona NSR/Kåfjord Sameforening.