Nicolai Julius Sørensen
Nicolai Julius Sørensen (14. september 1850–14. september 1923) var ein norsk folkehøgskulemann, forfattar, journalist/redaktør og politikar, fødd i Råde i Østfold.
| Nicolai Julius Sørensen | |||
| Fødd | 14. september 1850 Råde kommune | ||
|---|---|---|---|
| Død | 28. januar 1923 (72 år) | ||
| Statsborgar av | Noreg | ||
| Parti | Venstre | ||
| Yrke | skribent, redaktør, politikar | ||
| Ektefelle | Birgit Weltzien Sørensen | ||
| Barn | Alvhild Bratt | ||
| Alle verv |
| ||
Sørensen var son av ein gardbrukar i Råde og budde der til han var ti år gammal. Då flytta familien til Christiania. Han vart student frå Gjertsens skole i 1869 og tok juridisk embetseksamen i 1876. I studentåra var han dels journalist, huslærar eller lærar på folkehøgskule. Han og Ole Five dreiv folkehøgskule på Såner 1873-74 og i Vestby 1874-75.
1876-78 var Sørensen fullmektig på Johan Sverdrup sitt advokatkontor, samt medarbeidar i Verdens Gang. I 1878 oppretta han Alfheim høiskole, ein skule som dei neste tolv åra heldt hus i ulike herad i Østfold. Som høgskuleforstandar gav han ut bladet Heimdal og skreiv fleire bøker.
Sørensen redigerte 1878-81 også avisa Østlandske Tidende som kom ut i Fredrikstad. Her publiserte han tre artiklar og to dikt om kongedømme og republikk. Etter pålegg frå justisdepartementet vart han tiltala ringeakt for majesteten, og i underretten 20. januar 1881 dømt til 60 dagars fengsel og å dekke sakskostnadene. Dommen vart 7. juli same året stadfesta i Høgsterett og han sona deretter dommen i Fredrikstad rådhus.
I 1881 kjøpte Sørensen garden Foss i Askim. Han vart medlem av formannskapet i heradet og var ordførar i to år. 1883–88 representerte Sørensen Smaalenenes amt og partiet Venstre på Stortinget. Fyrste perioden var han medlem av justiskomiteen, siste perioden var han sekretær i justiskomite nr 2.
1888–93 gav Sørensen ut avisa Posten i Christiania og Skien. 1892–1918 var han statsrevisor.
Sørensen deltok i stiftinga av Norges fredsforening i 1885 og arbeidde sidan aktivt for denne, stifta i 1895 Kristiania fredsforening. 1898–1907 redigerte han tidsskriftet Fred. Elles heldt han foredrag for fredssaka og for fråhaldssaka.
Han døydde 1923 i Kristiania.
Kjelder
endre- Lindstøl, Tallak: Stortinget og Statsraadet 1814-1914. Kristiania, 1914
- Bokmålswikipedia
- Biografisk informasjon om Nicolai Julius Sørensen NSD Norsk senter for forskningsdatas politikararkiv