Olga Gyarmati

Olga Gyarmati (5. oktober 1924–27. oktober 2013) var ein ungarsk friidrettsutøvar frå Debrecen som vart olympisk meister i lengdehopp i 1948.

Olga Gyarmati
Statsborgarskap	Ungarn
Fødd	5. oktober 1924 Debrecen
Død	27. oktober 2013 (89 år) Greenfielt
Idrett	friidrett
Tok del i	Sommar-OL 1956, Sommar-OL 1952, Sommar-OL 1948

Aktiv

I åra fram til 1956 vann Gyarmati seg 31 nasjonale meisterskapsgull i friidrett. Ho vann lengdehopp åtte gongar, 80 meter hekk sju gongar, 100 meter tre gongar, og to gongar kvar 200 meter, høgdehopp og femkamp. Sine personlege rekordar i 80 m hekk og lengdehopp på høvesvis 11,1 sekundar og 6,23 meter, oppnådde ho i 1953.

Gyarmati kvalifiserte seg til Sommar-OL 1948 i London med eit lengdehopp på 5,99 m. I London landa ho på 5,69 meter i sitt beste hopp, likevel nok til å vinne gullmedaljen med ein margin på ni centimeter til argentinske Noemi Simonetto på andreplass. Gyarmati deltok også i høgdehopp der ho med 1,40 meter enda på 17.-plass. Fire år seinare, under Sommar-OL 1952 i Helsinki, deltok Gyarmati både i lengdehopp, 200 meter og 4 x 100 meter stafett. Best gjorde ho det i lengde med ein tiandeplass. I dei neste sommarleikane, i Melbourne i 1956, vart ho nummer elleve i spesialøvinga.

Gyarmati vende ikkje heim til Ungarn etter sommarleikane 1956, men slo seg ned i Storbritannia. Sidan flytta ho til USA. Ho døydde i Greenfield i delstaten Massachusetts.

Medaljar og plasseringar i internasjonale meisterskap

• OL 1948 i London: Gullmedalje i lengdehopp – 5,69 m
• OL 1952 i Helsinki: Nr 10 i lengdehopp – 5,67 m
• EM 1954 i Bern: Nr 15 i lengdehopp – 5,39 m
• OL 1956 i Melbourne: Nr 11 i lengdehopp – 5,66 m

Kjelder

• Denne artikkelen bygger på «Olga Gyarmati» frå Wikipedia på tysk, den 17. juni 2017.