Ottar Landfald

Ottar Ingebrigt Landfald (18. mai 1919–28. desember 2009) var ein norsk politikar, fødd i Verdal i Nord-Trøndelag. Han representerte Hedmark fylke og Senterpartiet på Stortinget frå 1973 til 1981.

Ottar Landfald
Fødd	18. mai 1919 Verdal
Død	28. desember 2009 (90 år)
Statsborgar av	Noreg
Parti	Senterpartiet
Yrke	politikar, bonde
Alle verv	stortingsrepresentant (1973–1977) vararepresentant til Stortinget (1969–1973) stortingsrepresentant (1977–1981)

Karriere

Landfald var son til ein gardbrukar og gjekk sjølv på ein norskdriven jordbruksskule i Sverige i 1943/44. Etter eit førebuande kurs ved Hamar Katedralskole 1945/46 utdanna han seg til sivilagronom ved Norges Landbrukshøgskole 1946–1949. Frå 1950 til 1980 var han gardbrukar på garden Kåterud i Stange, også overlærar ved Jønsberg landbruksskole 1951–1953.

Frå 1956 til 1968 var Landfald medlem i Stange formannskap. Han var formann mellom 1959 og 1970 i kornutvalet til Norges Bondelag, 1961–1965 i Hedmark Bondelag og 1969–1977 i fylkeslandbruksstyret i Hedmark. Seinare var han mellom 1983 og 1989 nestformann i styret i Statens kornforretning.

Valperiodane 1973–1977 og 1977–1981 var Landfald stortingsrepresentant for Senterpartiet og Hedmark. Han var i begge periodane medlem i Forsvarskomiteen.

Landfald vart tildelt Deltakarmedaljen med diplom i 1998.

Kjelder

• «Ottar Landfald». Stortinget.no.