Pjotr Tsjajkovskij

Peter Iljitsj Tsjajkovskij (fødd 25. april^jul./ 7. mai 1840^greg. i Votkinsk, republikken Udmurtia; død 25. oktober^jul./ 6. november 1893^greg. i St. Petersburg) var ein russisk komponist frå romantikken.

Pjotr Tsjajkovskij
Pjotr Tsjajkovskij, olje på lerret, 1893, Nikolaj Kusnezov, Tretjakovgalleriet
Fødd	25. april 1840
Fødestad	Votkinsk
Død	25. oktober 1893 (53 år)
Dødsstad	Malaya Morskaya Street, 13, St. Petersburg
Fødenamn	Пётр Ильи́ч Чайко́вский
Opphav	Det russiske imperiet
Aktiv	juni 1859–1893
Sjanger	symfoni, opera, ballett, klassisk musikk, romantisk musikk
Instrument	piano
Verka som	komponist, librettist, dirigent, koreograf, musikkpedagog, pianist, sjølvbiograf, musikkritikar, dagbokskrivar, omsetjar, universitetslærar
Mor	Aleksandra Tchaikovskaya
Far	Ilya Petrovich Tchaikovsky
Gift med	Antonina Ivanovna Miljukova
Prisar	4. klasse av Sankt Vladimirs orden, Sankt Vladimirs orden

Tsjajkovskij som ung

Underskrifta til Tsjajkovskij

Han har skrive seks symfoniar, ti operaer, ballettar, strykekvartettar, songar og pianostykke. Dei mest kjende verka hans er kanskje dei tre eventyrballettane, Svanesjøen, Tornerose og Nøtteknekkaren.

Sjølv om han ikkje var medlem av den russisk-nasjonalistiske gruppa av komponistar som vart kalla «den mektige handfullen», har musikken hans vore kjent og elska for sin særskilde russiske karakter, for ikkje å snakka om dei rike harmoniane og vakre melodiane han inneheld.

Liv

Tsjajkovskij viste tidleg musikalske evner og byrja å spela piano då han var fem. Han drog til konservatoriet i St. Petersburg i 1861, der han blei i fire år. I 1866 blei han utnemnd til professor i musikkteori og harmoni ved konservatoriet i Moskva, som blei oppretta same året. Denne posten heldt han til rundt 1878.

Tsjajkovskij var homofil, noko som absolutt ikkje sømde seg på den tida og som han difor heldt skjult. Skuldkjensla tyngde, og han blei tiltakande depressiv og nevrotisk, og sverma for tanken om å gifte seg med ei kvinne for betre å skjule legninga si. Den 28 år gamle Antonina Miljukova, som hevda ho var ein tidlegare elev, klarte ved hjelp av ei blanding av sjarme, raserianfall og trugsmål om sjølvmord å få Tsjajkovskij til å samtykke i ekteskap. Men Miljukova var ei nevrotisk, nymfoman kvinne som passa usedvanleg dårleg saman med den kjenslevare og idoliserande komponisten og etter berre fem dagars samliv skreiv han i eit brev til bror sin: «fysisk har ho ein fullstendig fråstøytande verknad på meg». Seks veker etter bryllaupet rømde han frå henne. Miljukova blei innlagd på ein psykiatrisk institusjon som «seksuelt forstyrra» i 1896 og døydde der i 1917.

Ei anna kvinne fekk ein mykje større vekt i livet til Tsjajkovskij: etter dei turbulente hendingane i 1877 gav den velståande enka Nadesja von Meck han eit årleg privatstipend på 6 000 rublar, noko som gjorde at han kunne konsentrere seg heilt om å komponere. Ei rekke meisterverk følgde no, dei første var den fjerde symfonien og operaen Eugene Onegin. Han blei snart kjend i resten av verda og turnerte i Europa og USA.

I 1893, berre ni dagar etter uroppføringa av den sjette symfonien hans, Symphonie Pathétique, døydde Tsjajkovskij av kolera etter å ha drukke eit glas infisert springvatn. Dei fleste forskarar er einige om at det var sjølvmord.

Komponisten blei gravlagd ved Alexander Nevsky-klosteret i St. Petersburg.

Verk

Symfoniar

• 1. Symfoni g-moll op.13 «Vinterdraumar» (1866)
• 2. Symfoni c-moll op.17 «Veslerussiske» (1872)
• 3. Symfoni D-Dur op.29 «Polske» (1875)
• 4. Symfoni f-moll op.36 (1877)
• Manfred-symfonien i fire bilde over eit dramatisk dikt av Byron, h-moll op. 58 (1886)
• 5. Symfoni e-moll op.64 (1888)
• 6. Symfoni h-moll op.74 «Pathétique» (1893)

Ballettar

• Svanesjøen (1876)
• Nøtteknekkaren (1892)
• Tornerose (1889)

Operaer

• Wojewode
• Undine
• Opritsjnik
• Smeden Wakula (andre utgåve vart kalla Tsjerevitsjki)
• Eugen Onegin
• Jomfrua av Orleans
• Mazeppa
• Trollkvinna
• Spar dame
• Jo|lanthe

Orkesterverk

• Pianokonsert nr. 1 op. 23 i b-moll (1875)
• Pianokonsert nr. 2 op. 44 i G-dur (1880)
• Pianokonsert nr. 3 op. 75 i Ess-dur (1893 - ikkje fullført, offentleggjort posthumt)
• Konsert for fiolin og orkester op. 35 (1878)
• Capriccio Italien op. 45 (1880)
• 1812-ouverturen op. 49 (1880)
• Romeo og Julie - Fantasieovertyre op. 18 (1869, revidert 1870 og 1880)
• Hamlet Fantasiovertyre op. 67 (1888)
• Slavisk marsj, op.31

Klaververk

• Scherzo à la russe (1867)
• Valse-Caprice (1868)
• Årstidene op. 37b (1876)
• Dumka op.59 (1886)
• Ulike korte stykke som impromptuar, valsar, polkaer, mazurkaer

Diverse

Eit portrett av Tsjajkovskij pryda ein moderne russisk mynt.

Litteratur

• Artikkelen «Peter Ilych Tchaikovsky» av Richard Osborne, i The Dictionary of Composers, 1986, red. Charles Osborne. London: PAPERMAC, ISBN 0 333 325370, s 343-347.

Bakgrunnsstoff

Commons har multimedium som gjeld: Pjotr Tsjajkovskij

Engelsk Wikiquote har ei sitatsamling som gjeld: Pjotr Tsjajkovskij

• Verk av og om Pjotr Tsjajkovskij i katalogen til det tyske nasjonalbiblioteket
• Tsjajkovskij research
• Verkliste
• Fritt tilgjengelege notar av Pjotr Tsjajkovskij på Mutopia-prosjektet
• Fritt tilgjengelege notar av Pjotr Iljitsjyich Tchaikovsky ved International Music Score Library Project (IMSLP)

• Fritt tilgjengelege notar av Pjotr Tsjajkovskij i Werner Icking Music Archive (WIMA)