Regnskogfondet
Regnskogfondet er ein ikkje-statleg organisasjon (NGO) som arbeider for å verne regnskogane i verda og sikre dei juridiske rettane til innbyggjarane innanfor regnskogsterritoria. Målsettinga er at bruksrettar til skogen blir styrkte for den lokale folkesetnaden og at folkesetnaden kan leve godt i regnskogen på eigne vilkår. Dette er ein av dei største organisasjonane i verda for regnskogvern, og han samarbeider med rundt 70 lokale og nasjonale miljøvern-, urfolk- og menneskerettsorganisasjonar i 7 land med regnskog, i Amazonas, i Sentral-Afrika og i Søraust-Asia.[1] Organisasjonen arbeider for å sikre rettane og auke busette sitt ansvar for regnskogvern; å hindre politiske og næringsinteresser frå å medverke til øydelegging av regnskogen; og for å konsolidere politikk og praksis som tener til å verne han.[2] Regnskogfondet driv påverknadsarbeid i viktige internasjonale prosessar i høve til problema til regnskogen verda rundt.
| Regnskogfondet | |||
| Type | forening/lag/innretning | ||
|---|---|---|---|
| Org.nummer | 985828806 | ||
| Skipa | 1989 | ||
| Hovudkontor | Oslo | ||
| Nettstad | https://regnskog.no/no  | ||
Regnskogfondet vart grunnlagt i 1989, og er i dag ein av Europas leiande organisasjonar innanfor fagfeltet regnskogvern.[3] Det er ein del av Rainforest Foundation-nettverket, med uavhengige systerorganisasjonar i USA og Storbritannia.
Regnskogfondet er organisert som ei stifting, og verksemda er finansiert av offentlege styresmakter, og dessutan av private gjevarar, internasjonale fond og sponsorar. TV-aksjonen 2015, arrangert av NRK, gjekk til Regnskogfondet.[4]
Historie endre
Den veldedige stiftinga Rainforest Foundation International vart skipa av artisten Sting og skodespelaren Trudie Styler i 1989. Det skjedde etter at leiaren av Kayapo-folket i Brasil gjorde ein personleg førespurnad til dei to om å hjelpe samfunnet deira og verne landet og kulturen. Den norske greina av nettverket av det internasjonale Regnskogfondet vart skipa same året.[1] I 1996 vart den norske greina ei uavhengig stifting, med fem norske medlemsorganisasjonar. Den første daglege leiaren var Lars Løvold, som var leiar fram til 2018, unntatt åra 2014-2015 då Dag Hareide var leiar. Øyvind Eggen er generalsekretær i organisasjonen per januar 2020.[5]
Tilnærming til regnskogvern endre
Regnskogfondet nyttar ei tilnærming til regnskogvern basert på lovmessige, sosiale og etiske rettar til folkesetnaden.[6] Tilnærminga byggjer på førestillinga om at busette folk som i generasjonar har utvikla kulturane sine og samfunn i balansert samspel med særs komplekse og sårbare økosystem, har grunnleggjande rettar til desse områda.[7] For å oppnå målsettinga om å oppnå rettsbasert regnskogforvalting i betydelege regnskogsområde i alle 11 land der Regnskogfondet og partnarane er aktive, stør organisasjonen program og prosjekt i samarbeid med lokale organisasjonar, urfolk i regnskogen. Regnskogfondet søkjer òg endringar i politikk og praksisen i forvaltinga til styresmaktene, mellomstatlige organ og til private føretak. Det søkjer òg å generere og styrkje nasjonal og internasjonal offentleg merksemd og handling.[6] I tillegg har organisasjonen vedteke ei tilnærming som vektlegg styrking av det sivile samfunn som eit viktig mål i dei landa der han er aktiv. På denne bakgrunnen har stiftinga prioritert å byggja langsiktige partnarskap med aktuelle lokale og nasjonale organisasjonar, og dessutan å stø utviklinga av representative urfolkorganisasjonar og samfunnsbaserte organisasjonar.[6]
Program endre
Ut frå målsettinga om regnskogsvern arbeider Regnskogfondet for rettane til urfolket i regnskogsområda ved å gje økonomisk stønad til prosjekt, byggje kompetanse og gje direkte teknisk assistanse til dei lokale partnarane, inkludert urfolksamfunn og grasrotorganisasjonar. I tillegg til å arbeida med desse gruppene direkte gjennom programverksemd i lokalsamfunnet, stør Regnskogfondet dei indirekte gjennom politikk, opplysings- og informasjonsarbeid retta mot sikring av rettar, etablering av eksklusive territorium til urfolk og regnskogvern.[6]
Kjelder endre
- Denne artikkelen bygger på «Rainforest Foundation Norway» frå Wikipedia på engelsk, den 18. oktober 2015.
- Referansar
- ↑ 1,0 1,1 Om Regnskogfondet Nettside hos regnskog.no. Lest 30. januar 2020
- ↑ «Annual Report for 2012». Rainforest Foundation Norway. Henta 18. oktober 2015.
- ↑ «The Norwegian Committee for Fundraising in Norway». Arkivert frå originalen 4. mars 2016. Henta 18. oktober 2015.
- ↑ TV-aksjonen 2015 til Regnskogfondet Nettside hos nrk.no. Lest 30.januar 2015
- ↑ Ovesyn tilsette i Regnskogfondet Nettside hos regnskog.no. Lest 30. januar 2020
- ↑ 6,0 6,1 6,2 6,3 «Organizational Performance Review of Rainforest Foundation Norway». The Norwegian Agency for Development Cooperation. Henta 18. oktober 2015.
- ↑ «Saving the rainforest: Why human rights is the key». Just Conservation. Henta 18. oktober 2015.
